ഡെറാഡൂണ്‍: മോഷണംപോയ ഐഫോണിന്റെ പാസ്വേഡ് ആവശ്യപ്പെട്ട് ഫോണ്‍ കൈവശമുള്ളയാള്‍ കുടുംബത്തെ ബന്ധപ്പെട്ടതായി പരാതി. ഉത്തരാഖണ്ഡിലെ ഡെറാഡൂണ്‍ സണ്‍ഷൈന്‍ എന്‍ക്ലേവ് സ്വദേശിനി കൗശികി ധ്യാനിയാണ് സന്ദേശങ്ങളുടെ സ്‌ക്രീന്‍ഷോട്ടുകളും സിസിടിവി ദൃശ്യങ്ങളും പങ്കുവെച്ച് രംഗത്തെത്തിയത്. തെളിവുകള്‍ ലഭിച്ചിട്ടും പൊലീസ് ഉടന്‍ നടപടിയെടുത്തില്ലെന്നാണ് യുവതിയുടെ ആരോപണം.
സെപ്റ്റംബര്‍ 12ന് ക്ലെമന്റ് ടൗണിലെ വീട്ടില്‍നിന്നാണ് ഫോണ്‍ മോഷണംപോയത്. ഫോണ്‍ അണ്‍ലോക്ക് ചെയ്യാന്‍ കഴിയാതിരുന്നതോടെ അതിന്റെ സ്‌ക്രീനില്‍ കാണിച്ചിരുന്ന ബന്ധപ്പെടാനുള്ള നമ്പര്‍ ഉപയോഗിച്ച് പാസ്വേഡ് ആവശ്യപ്പെട്ട് വാട്സാപ്പിലും എസ്എംഎസിലും സന്ദേശങ്ങള്‍ അയച്ചെന്നാണ് കൗശികി പറയുന്നത്. രാത്രി പത്തുമണിയോടെ സന്ദേശങ്ങള്‍ ലഭിച്ചതിനു പിന്നാലെ പൊലീസ് സ്റ്റേഷനിലെത്തിയെങ്കിലും പിറ്റേന്ന് രാവിലെ വരാന്‍ ആവശ്യപ്പെട്ട് മടക്കിയയച്ചതായി യുവതി ആരോപിച്ചു. സന്ദേശങ്ങളും സംശയിക്കുന്ന വ്യക്തിയുടെ ചിത്രവും സിസിടിവി ദൃശ്യങ്ങളും ഉണ്ടായിട്ടും നടപടി വൈകുന്നത് എന്തുകൊണ്ടാണെന്നും അവര്‍ ചോദിച്ചു.
സമീപപ്രദേശങ്ങളില്‍നിന്ന് ലാപ്ടോപ്പുകളും മൊബൈല്‍ ഫോണുകളും ഉള്‍പ്പെടെയുള്ള വിലപിടിപ്പുള്ള വസ്തുക്കള്‍ നഷ്ടപ്പെട്ടതായും കൗശികി പറഞ്ഞു. ഡിഐടി, ഗ്രാഫിക് എറ സര്‍വകലാശാലകള്‍ക്ക് സമീപത്തെ മോഷണങ്ങളുമായി സംഭവത്തിന് ബന്ധമുണ്ടോയെന്ന് പരിശോധിക്കണമെന്നും അവര്‍ ആവശ്യപ്പെട്ടു. അതേസമയം, പരാതി ലഭിച്ച ദിവസംതന്നെ ഫോണ്‍ കണ്ടെത്തുന്നതിനുള്ള വിവരങ്ങള്‍ പൊലീസ് പോര്‍ട്ടലില്‍ രജിസ്റ്റര്‍ ചെയ്തിട്ടുണ്ടെന്നും സിസിടിവി ദൃശ്യങ്ങള്‍ പരിശോധിക്കുകയാണെന്നും പൊലീസ് അറിയിച്ചു. സന്ദേശമയച്ചയാളുടെ തിരിച്ചറിയലും മറ്റു മോഷണങ്ങളുമായുള്ള ബന്ധവും ഔദ്യോഗികമായി സ്ഥിരീകരിച്ചിട്ടില്ല. അന്വേഷണം തുടരുകയാണ്.
