വിഷു ദിനത്തില്‍ കേരളത്തിന്റെ വിവിധ ജില്ലകളില്‍ പലതരം ആഘോഷങ്ങളാണുള്ളത്. പായസം വയ്ക്കലും അടയുണ്ടാക്കലും സദ്യയൊരുക്കലുമൊക്കെ വിഷു സദ്യയുടെ ഭാഗം. മലയാളിയുടെ സദ്യയിലെ ആഡംബരമായ പ്രഥമന്‍ വിഷു സദ്യയിലും മുഖ്യ ഇനം തന്നെ. പ്രഥമന്‍ തയാറാക്കാനുള്ള എളുപ്പ മാര്‍ഗമിതാ.

ആവശ്യമുള്ള സാധനങ്ങള്‍

ഉണക്കലരി- 250 ഗ്രാം
പഞ്ചസാര- 30 ഗ്രാം
വെളിച്ചെണ്ണ - 30 ഗ്രാം
തേങ്ങ - രണ്ട് (വലുത് )
ശര്‍ക്കര - 600 ഗ്രാം
വെണ്ണ - 50 ഗ്രാം
ഏലയ്ക്കാപ്പൊടി - ആവശ്യത്തിന്
നെയ്യ് - പാകത്തിന്
ഉണക്കമുന്തിരി - വലിയ സ്പൂണ്‍
കശുവിപ്പരിപ്പ് - 9

തയ്യാറാക്കുന്ന വിധം

- ഉണക്കലരി വൃത്തിയായി കഴുകി, വെള്ളം തോര്‍ത്തിയെടുത്ത ശേഷം നന്നായി പൊടിച്ച്, തരി ഇല്ലാതെ എടുക്കുക.
- അരിപ്പൊടിയും വെളിച്ചണ്ണയും പഞ്ചസാരയും യോജിപ്പിച്ച് പാകത്തിന് വെള്ളമൊഴിച്ച് ദോശമാവിന്റെ പരുവത്തില്‍ കലക്കുക.
- വാഴയില ചെറുതായി കീറി, ഒന്നു വാട്ടിയ ശേഷം അതിലേക്ക് മാവ് കൈകൊണ്ട് കോരിയൊഴിച്ച്, ഇല പൊട്ടാതെ ചുരുട്ടുക.
- ഇലയുടെ തണ്ടില്‍ നിന്നും നാരുകീറിയ ശേഷം ഇല കെട്ടിവയ്ക്കുക.
- പരന്ന പാത്രത്തില്‍ വെള്ളമൊഴിച്ച് അടുപ്പത്തു വച്ചു നന്നായി വെട്ടിത്തിളയ്ക്കുമ്പോള്‍ കെട്ടിവച്ചിരിക്കുന്ന ഇലകള്‍ പൊട്ടിപ്പോകാതെ വെള്ളത്തിലിടുക.
- ഇരുവശവും കെട്ടിവയ്ക്കണം. ഇല്ലെങ്കില്‍ ഉള്ളില്‍ വെള്ളം കയറും.
- അട നന്നായി വെന്തശേഷം വാങ്ങി, വെള്ളം ഊറ്റിക്കളയുക.
- പിന്നീട് തണുത്ത വെള്ളമൊഴിച്ച്, അടകള്‍ ഇലയില്‍ നിന്ന് അടര്‍ത്തിയെടുക്കുക.
- ആറിയ ശേഷം ചെറിയ കഷണങ്ങളായി അരിയുക.
- തേങ്ങ ചിരണ്ടി, അരച്ചെടുത്ത് ഒന്നും രണ്ടും മൂന്നും പാല്‍ പിഴിഞ്ഞു മാറ്റി വയ്ക്കുക.
- ശര്‍ക്കര കുറച്ചു വെള്ളമൊഴിച്ച് തിളപ്പിച്ച് മണ്ണു കളഞ്ഞ ശേഷം മൂന്നാം പാലും അടയും ചേര്‍ത്തു നന്നായി തിളപ്പിക്കുക.
- വറ്റിത്തുടങ്ങുമ്പോള്‍ , രണ്ടാം പാലൊഴിച്ച് വറ്റിച്ചു പാകമാകുമ്പോള്‍ വെണ്ണ ചേര്‍ത്ത്, ആദ്യത്തെ പാലൊഴിച്ച് വാങ്ങിവയ്ക്കുക.
- ഇതില്‍ ഏലയ്ക്കാപ്പൊടി ചേര്‍ത്തിളക്കിയ ശേഷം നെയ്യില്‍ വറുത്ത അണ്ടിപ്പരിപ്പും ഉണക്കമുന്തിരിയും ചേര്‍ത്തിളക്കുക.

വിഷുവിന് മധുരം പകരാനുള്ള പ്രഥമന്‍ ഇനി ചൂടോടെ വിളമ്പാം.