കട്ടപ്പന: ഇടുക്കി പെരുവന്താനത്ത് നെടുംതോട്ടില് അവശനിലയില് കണ്ടെത്തിയ യുവാവിനെ പെരുവന്താനം പൊലീസ് സാഹസികമായി രക്ഷപ്പെടുത്തി. മുണ്ടക്കയം പുത്തന്ചന്ത സ്വദേശി ഷെഫീക്കിനെയാണ് (വയസ്സ് ലഭ്യമല്ല) തോട്ടില് നിന്ന് കരയ്ക്ക് എത്തിച്ചത്. ശനിയാഴ്ച രാവിലെ ആറരയോടെയാണ് സംഭവം.
നെടുംതോട്ടില് ഒരാള് തോട്ടില് കിടക്കുന്നതായി നാട്ടുകാര് പെരുവന്താനം പൊലീസില് വിവരം അറിയിക്കുകയായിരുന്നു. ഉടന്തന്നെ സ്ഥലത്തെത്തിയ പൊലീസ് സംഘം റോഡിന് എതിര്വശത്തുള്ള പൊന്തയ്ക്കുള്ളില് കുടുങ്ങിയ നിലയില് കിടന്നിരുന്ന യുവാവിനെ കണ്ടെത്തി. ആദ്യം മരിച്ചുവെന്ന് കരുതി നാട്ടുകാര് മാറിനില്ക്കുകയായിരുന്നു.
പൊലീസ് തോട്ടില് ഇറങ്ങി നടത്തിയ പരിശോധനയില് യുവാവിന് ജീവനുണ്ടെന്ന് ഉറപ്പായതോടെ ഉടന് തന്നെ കരയ്ക്ക് എത്തിച്ച് മെഡിക്കല് ട്രസ്റ്റ് ആശുപത്രിയില് പ്രാഥമിക ചികിത്സ നല്കി. പിന്നീട് കാഞ്ഞിരപ്പള്ളി ജനറല് ആശുപത്രിയിലേക്ക് മാറ്റിയതായും അപകടനില തരണം ചെയ്തതായും ബന്ധുക്കള് അറിയിച്ചു.
പെരുവന്താനം പൊലീസ് സ്റ്റേഷനിലെ സിവില് പൊലീസ് ഓഫീസര്മാരായ സിയാദ്, ജോമോന് എന്നിവര് ചേര്ന്നാണ് വെള്ളത്തില് മുങ്ങിപ്പോകുന്ന നിലയിലുള്ള സ്ഥലത്തു നിന്ന് യുവാവിനെ രക്ഷപ്പെടുത്തിയത്. ഏതാനും ദിവസങ്ങളായി ശാരീരിക അസ്വസ്ഥതയെ തുടര്ന്ന് ഷെഫീക്ക് മരുന്ന് കഴിച്ചിരുന്നതായും വീട്ടുകാര് വ്യക്തമാക്കി.
