ഇസ്ലാമാബാദ്: പാകിസ്ഥാന്റെ മധ്യസ്ഥതയില് 21 മണിക്കൂറോളം നീണ്ട യുഎസ്-ഇറാന് മാരത്തണ് ചര്ച്ച ഫലം കണ്ടില്ല. ആണവായുധം വികസിപ്പിക്കരുതെന്ന അമേരിക്കന് നിബന്ധനകള് ഇറാന് അംഗീകരിക്കാന് വിസമ്മതിച്ചതിനെത്തുടര്ന്ന്, സമാധാന കരാറില്ലാതെ ചര്ച്ചകള് അവസാനിച്ചതായി യുഎസ് വൈസ് പ്രസിഡന്റ് ജെ.ഡി. വാന്സ് അറിയിച്ചു. വാര്ത്താസമ്മേളനത്തില് വാന്സ് വ്യക്തമാക്കി, ''ഞങ്ങള്ക്ക് ഒരു ഉടമ്പടിയിലെത്താന് കഴിഞ്ഞില്ല എന്നത് ദുഃഖകരമായ വാര്ത്തയാണ്. ഇത് അമേരിക്കയെക്കാള് ഇറാനാണ് കൂടുതല് ബാധിക്കുക. ചര്ച്ചകളില് പാകിസ്ഥാനികള് മികച്ച മധ്യസ്ഥത നടത്തി, പക്ഷേ ഇറാനികള് ഞങ്ങളുടെ നിബന്ധനകള് അംഗീകരിച്ചില്ല.''
ആണവായുധവുമായി ബന്ധപ്പെട്ട വിഷയങ്ങളാണ് ചര്ച്ച തടസപ്പെടുത്തിയത്. ഹോര്മൂസ് കടലിടുക്ക് വഴിയുള്ള ഗതാഗത അവകാശങ്ങള്, ഇറാന്റെ ആണവ അവകാശങ്ങള് തുടങ്ങിയ വിഷയങ്ങളില് അഭിപ്രായവ്യത്യാസം നിലനിന്നതായി ഇറാന് അധികൃതര് വ്യക്തമാക്കി. അമേരിക്കയുമായുള്ള ചര്ച്ചകള് കരാറില്ലാതെ അവസാനിച്ചതായി ഇറാനിയന് വാര്ത്താ ഏജന്സികളും സ്ഥികരിച്ചു. ''യുഎസിന്റെ അമിതമായ ആവശ്യങ്ങള് പൊതുവായ ഒരു ചട്ടക്കൂട് രൂപപ്പെടുത്തുന്നതിന് തടസ്സമായി,'' ഇറാന് അധികൃതര് പറഞ്ഞു. ചര്ച്ച പരാജയപ്പെട്ടതോടെ ഇറാനും യുഎസും തമ്മില് ഉണ്ടായിരുന്ന രണ്ടാഴ്ചത്തെ വെടിനിര്ത്തല് കരാറും അനിശ്ചിതത്വത്തിലാവുമെന്നാണ് വിലയിരുത്തല്.
