ദീര്‍ഘകാല വിസകളും, സ്റ്റുഡന്റ് വിസകളും നേടുന്ന ഇയു ഇതര പൗരന്‍മാരില്‍ ഇന്ത്യക്കാരാണ് ഇപ്പോഴും മുന്നിലുള്ളത്. പുതുതായി എത്തുന്നവരുടെ എണ്ണത്തില്‍ ഇടിവ് വരുമ്പോഴാണ് ഇത്. ഇതിനൊപ്പം ബ്രിട്ടന്‍ വിട്ടുപോകുന്ന ഇന്ത്യന്‍ വംശജരുടെ എണ്ണത്തിലും വര്‍ദ്ധനവുണ്ട്.

2025 ഡിസംബറില്‍ അവസാനിച്ച വര്‍ഷത്തില്‍ 40,000 തൊഴില്‍, 89,000 സ്റ്റഡി, മറ്റ് 9000 ദീര്‍ഘവിസകളാണ് ഇന്ത്യന്‍ പൗരന്‍മാര്‍ക്ക് ലഭിച്ചത്. പാകിസ്ഥാന്‍, ചൈനീസ്, നൈജീരിയന്‍, നേപ്പാളി പൗരന്‍മാരാണ് ടോപ്പ് 5-ലുള്ള മറ്റ് രാജ്യങ്ങള്‍.

മുന്‍ വര്‍ഷത്തെ അപേക്ഷിച്ച് 11% ഇടിവാണ് ഉണ്ടായിട്ടുള്ളത്. മുന്‍ വര്‍ഷം 156,000 വിസകളാണ് ഇന്ത്യക്കാര്‍ക്ക് ലഭിച്ചത്. 2023-ല്‍ 277,000 വിസകളാണ് ഇന്ത്യക്കാര്‍ കിട്ടിയത്. ലേബര്‍ ഗവണ്‍മെന്റും, മുന്‍ കണ്‍സര്‍വേറ്റീവ് ഗവണ്‍മെന്റും നടപ്പിലാക്കിയ ഇമിഗ്രേഷന്‍ നിയന്ത്രണങ്ങള്‍ യുകെയുടെ ദീര്‍ഘകാല വിസ ലഭിക്കുന്നത് എല്ലാ രാജ്യക്കാര്‍ക്കും തിരിച്ചടിയായി മാറിയിട്ടുണ്ട്.

വിദേശ വിദ്യാര്‍ത്ഥികളും, കെയര്‍ വര്‍ക്കര്‍മാരും കുടുംബാംഗങ്ങളെ കൊണ്ടുവരുന്നതിന് വിലക്ക് ഏര്‍പ്പെടുത്തിയും, സ്‌കില്‍ഡ് വര്‍ക്കര്‍ വിസയിലെ വരുമാന പരിധി കൂട്ടിയും, ഹെല്‍ത്ത്, കെയര്‍ റൂട്ട് അവസാനിപ്പിച്ചും ബ്രിട്ടീഷ് ഗവണ്‍മെന്റുകള്‍ ഇമിഗ്രേഷന്‍ നയങ്ങള്‍ കര്‍ശനമാക്കിയിരുന്നു.