മുംബൈ: ട്രെയിനിലെ തേഡ് എസി കോച്ചിന്റെ ലോവര്‍ ബര്‍ത്തില്‍ ഇരുന്ന് പാന്‍ തയ്യാറാക്കുന്നയാളുടെ വീഡിയോ സമൂഹമാധ്യമങ്ങളില്‍ ശ്രദ്ധ നേടുന്നു. മുംബൈയില്‍നിന്ന് ഛത്തീസ്ഗഢിലേക്കുള്ള യാത്രയ്ക്കിടെ പകര്‍ത്തിയതെന്ന പേരിലാണ് ദൃശ്യങ്ങള്‍ പ്രചരിക്കുന്നത്. ബര്‍ത്തില്‍ തുണിവിരിച്ച് പാന്‍ തയ്യാറാക്കാനുള്ള സാധനങ്ങള്‍ നിരത്തിവച്ചാണ് ഇയാളുടെ ജോലി. സമീപത്തെ യാത്രക്കാര്‍ ഇത് നോക്കിയിരിക്കുന്നതും ദൃശ്യങ്ങളിലുണ്ട്. മറ്റു യാത്രക്കാരില്‍നിന്ന് ഏകദേശം 20-25 പാനുകളുടെ ഓര്‍ഡര്‍ ലഭിച്ചിട്ടുണ്ടെന്നാണ് വീഡിയോ പകര്‍ത്തിയയാള്‍ പറയുന്നത്. '@indiain24hr' എന്ന എക്‌സ് അക്കൗണ്ടിലൂടെയാണ് വീഡിയോ പങ്കുവച്ചത്.

ദൃശ്യങ്ങള്‍ വ്യാപകമായി പ്രചരിച്ചതോടെ കോച്ചിനുള്ളിലെ ശുചിത്വത്തെക്കുറിച്ചും ഇത്തരം വില്‍പ്പനയ്ക്ക് അനുമതിയുണ്ടോയെന്നതിനെക്കുറിച്ചും ചോദ്യങ്ങളുയര്‍ന്നു. യാത്രക്കാര്‍ വിശ്രമിക്കാനുപയോഗിക്കുന്ന ബര്‍ത്തില്‍ ഭക്ഷ്യവസ്തുക്കള്‍ തയ്യാറാക്കുന്നത് ഉചിതമാണോയെന്നും സമൂഹമാധ്യമ ഉപയോക്താക്കള്‍ ചോദിക്കുന്നു. സംഭവം നടന്ന ട്രെയിനിന്റെ പേരും മറ്റ് വിശദാംശങ്ങളും സ്ഥിരീകരിക്കപ്പെട്ടിട്ടില്ല. ലഭ്യമായ റിപ്പോര്‍ട്ടുകള്‍ പ്രകാരം സംഭവത്തില്‍ റെയില്‍വേയുടെ ഔദ്യോഗിക വിശദീകരണവും പുറത്തുവന്നിട്ടില്ല.