അടുക്കളയില് സൂക്ഷിച്ചിരുന്ന ഇന്ഡക്ഷന് കുക്കര് പൂച്ചയുടെ കാല്തട്ടി ഓണായി. പിന്നാലെ ഉണ്ടായ തീപിടുത്തത്തില് വീട് കത്തി നശിച്ചു. സംഭവം അങ്ങ് ചൈനയിലാണ്. ഇന്ഡക്ഷന് കുക്കര് ഓണായ വിവരം വീട്ടുടമ അറിയാതെ പോയതാണ് അപകടത്തിന് കാരണമായതെന്ന് റിപ്പോര്ട്ടുകള് പറയുന്നു. തീപിടുത്തതില് 1,00,000 യുവാന് അതായത് 12 ലക്ഷം രൂപയുടെ നഷ്ടമാണ് കണക്കായിരിക്കുന്നത്.തെക്കുപടിഞ്ഞാറന് ചൈനയിലെ സിചുവാന് പ്രവിശ്യയിലുള്ള ദണ്ഡന് എന്ന വ്യക്തിയുടെ ഉടമസ്ഥതയിലുള്ള ഫ്ലാറ്റാണ് കത്തിനശിച്ചത്. സംഭവ സമത്ത് ദണ്ഡന് ഫ്ലാറ്റില് ഉണ്ടായിരുന്നില്ല. ഇവരുടെ പൂച്ചകൂട്ടിയായ ജിങ്കൗഡിയോ മാത്രമാണ് ഫ്ലാറ്റില് ഉണ്ടായിരുന്നത്. അതേ സമയം തീപിടുത്തതില് ജിങ്കൗഡിയോ സാരമായ പരിക്കുകളോടെ രക്ഷപ്പെട്ടെന്നും റിപ്പോര്ട്ടുകള് പറയുന്നു.
ഏപ്രില് നാലിനാണ് സംഭവം നടന്നത്. ഫ്ലാറ്റിന് തീ പിടിച്ചുവെന്ന് കോമ്പൗണ്ടിലെ പ്രോപ്പര്ട്ടി മാനേജുമെന്റ് സ്റ്റാഫില് നിന്ന് വിവരം ലഭിച്ചതിനെ തുടര്ന്നാണ് ദണ്ഡന് സ്ഥലത്തെത്തിയത്. ഫ്ലാറ്റിലെത്തി പരിശോധിച്ചപ്പോഴാണ് അടുക്കളയുള്പ്പെടുന്ന വീടിന്റെ ഒരു ഭാഗം കത്തിനശിച്ചതായി കണ്ടെത്തിയത്. ഇന്ഡക്ഷന് കുക്കര് അധിക സമയം ഓണായി ഇരുന്നതിനെ തുടര്ന്നാണ് അപകടം ഉണ്ടായത്. സിസടിവി ദൃശ്യങ്ങള് പരിശോധിച്ചപ്പോഴാണ് പൂച്ചയുടെ കാല് തട്ടി ഇന്ഡക്ഷന് കുക്കര് ഓണായത് കണ്ടെത്തിയത്. ജിന്ഗൗഡിയാവോ അടുക്കളയില് കളിക്കുന്നതിനിടയില് ഇന്ഡക്ഷന് കുക്കറിന്റെ ടച്ച് പാനലില് അബദ്ധത്തില് ചവിട്ടിയതോടെ അത് ഓണാവുകയായിരുന്നു.
ദണ്ഡന് തന്നെയാണ് തന്റെ സോഷ്യല് മീഡിയ അക്കൗണ്ടിലൂടെ ഈ വിവരങ്ങള് പുറത്തുവിട്ടത്. തുടര്ന്ന് അവള് തന്റെ ഡൂയിന് എന്ന സാമൂഹിക മാധ്യമ അക്കൗണ്ടിലെ പേര് 'സിച്ചുവാനിലെ ബാഡ് ആസ് ക്യാറ്റ്' എന്നാക്കി മാറ്റിയത് സോഷ്യല് മീഡിയയില് ശ്രദ്ധിക്കപ്പെട്ടു. വീടിന്റെ പകുതിയും കത്തി നശിച്ചിട്ടും അപകടത്തോടുള്ള ഉടമയുടെ ലഘുവായ പ്രതികരണവും പൂച്ചയുടെ ഭംഗിയുള്ള രൂപവും കുറിപ്പ് ഏറെ പേരെ ആകര്ഷിച്ചു. 8 ദശലക്ഷം പേരാണ് ഇതിനകം ഡൂയിനിലെ കുറിപ്പ് കണ്ടത്. പിന്നാലെ നിരവധി പേരാണ് തങ്ങളടെ പൂച്ചകള് വീട്ടില് ഒപ്പിച്ച് വയ്ക്കുന്ന കുസൃതികളുടെ കെട്ടഴിച്ചത്.