തിരുവനന്തപുരം: യുകെയില് വിസ വാഗ്ദാനം ചെയ്ത് 14 ലക്ഷത്തോളം രൂപ തട്ടിയ കേസില് പ്രതി അറസ്റ്റില്. കണ്ണൂര് ചാലോട് മുഞ്ഞനാട് വാണിയപ്പാറയില് അഭിലാഷ് ഫിലിപ്പ് (38) ആണ് ആറ്റിങ്ങല് പൊലീസിന്റെ പിടിയിലായത്. ആറ്റിങ്ങല് സ്വദേശിനിയും കോടതി ജീവനക്കാരിയുമായ യുവതിയില്നിന്നാണ് പണം തട്ടിയത്.'സ്റ്റാര് നെറ്റ്' ഇന്റര്നാഷണല് റിക്രൂട്ട്മെന്റ് പ്രൈവറ്റ് ലിമിറ്റഡ് എന്ന കമ്പനി നടത്തിയിരുന്ന ഇയാള് വിദേശ രാജ്യങ്ങളില് ആകര്ഷകമായ ശമ്പളം ലഭിക്കുമെന്നും ജോലി തരപ്പെടുത്തി വിസ നല്കാമെന്നും പറഞ്ഞ് വിശ്വസിപ്പിച്ചാണ് പണം തട്ടിയത്.
ടെലിഗ്രാം, ഇന്സ്റ്റഗ്രാം, ഫെയ്സ്ബുക്ക് തുടങ്ങി സമൂഹ മാധ്യമങ്ങളില് ആകര്ഷകമായ രീതിയില് കമ്പനിയുടെ പ്രൊഫൈല് നിര്മിച്ച് ഉദ്യോഗാര്ഥികളെ വിശ്വസിപ്പിച്ചു. വ്യാജ സ്പോണ്സര്ഷിപ്പ് സര്ട്ടിഫിക്കറ്റുകള് തരപ്പെടുത്തിയാണ് പലരില്നിന്ന് പണം കൈപ്പറ്റിയത്. ഈ തുക ഓസ്ട്രേലിയയിലുള്ള മറ്റൊരു കൂട്ടാളിയുടെ അക്കൗണ്ടിലേക്ക് മാറ്റിയിരുന്നു. നൂറ് കണക്കിന് ആളുകളില്നിന്നായി പത്ത് കോടിയോളം രൂപ തട്ടിയെടുത്തതായി വിവരം ലഭിച്ചിട്ടുണ്ട്. ആറ്റിങ്ങല്, കല്ലമ്പലം, വിയ്യൂര്, എറണാകുളം ടൗണ് സൗത്ത്, പുത്തന്വേലിക്കര തുടങ്ങിയ പല പൊലീസ് സ്റ്റേഷനുകളിലായി അഭിലാഷിന്റെ പേരില് പത്തോളം കേസുണ്ട്.
