ന്യൂയോര്ക്ക്: യുകെയിലേക്ക് മടങ്ങാന് തനിക്കും ഭാര്യ മേഗന് മാര്ക്കിളിനും പദ്ധതിയില്ലെന്ന് ഹാരി രാജകുമാരന് വെളിപ്പെടുത്തി. യുഎസില് തുടരാനാണ് ആഗ്രഹമെന്ന് ബുധനാഴ്ച ന്യൂയോര്ക്കില് നടന്ന ഡീല്ബുക്ക് ഉച്ചകോടിയില് ഹാരി പറഞ്ഞു. തല്ക്കാലം യുകെയില് നിന്ന് മാറിനില്ക്കാനുള്ള തീരുമാനത്തിന് സുരക്ഷയും കുട്ടികളുടെ ഭാവിയുമാണ് കാരണം. യുഎസില് താമസിക്കുന്നതും കുട്ടികളെ ഇവിടെ വളര്ത്തുന്നതും വളരെയധികം ആസ്വദിക്കുന്നു. യുകെയില് ചെയ്യാന് കഴിയാത്ത പലതും ഇവിടെ ചെയ്യാന് കഴിയും. ഏറ്റവും മികച്ച ഭര്ത്താവും അച്ഛനുമാകാന് ശ്രദ്ധ കേന്ദ്രീകരിക്കുകയാണ്
കുട്ടികള്ക്കായി സമൂഹ മാധ്യമങ്ങള് നിരോധിക്കുന്നതിനോട് തനിക്ക് യോജിപ്പില്ല. അത് കുടുംബ വഴക്കുകള്ക്കും കളിസ്ഥലങ്ങളിലെ ഭീഷണിപ്പെടുത്തലിനും ഇടയാക്കും. എന്നാല് സമൂഹ മാധ്യമ കമ്പനികള് കൂടുതല് സുതാര്യത പുലര്ത്തണ്ടേത് ആവശ്യമാണെന്നും ഹാരി പറഞ്ഞു. 2020 മുതല് കലിഫോര്ണിയയിലെ മോണ്ടെസിറ്റോയിലാണ് ഹാരിയും മേഗനും താമസിക്കുന്നത്. രാജകുടുംബത്തിലെ സീനിയര് അംഗങ്ങളെന്ന നിലയിലുള്ള സ്ഥാനങ്ങളില്നിന്ന് മാറിനില്ക്കുകയാണെന്ന് ഹാരിയും മേഗനും മുന്പ് വ്യക്തമാക്കിയിരുന്നു. കൊട്ടാരത്തില് തങ്ങള്ക്ക് അര്ഹമായ പരിഗണനയും പിന്തുണയും കിട്ടുന്നില്ലെന്നും അപമാനകരമായ സമീപനത്തെ നേരിടേണ്ടി വരുന്നുവെന്നുമുള്ള പരാതിയായിരുന്നു ഇതിനുള്ള കാരണം.
