ഏര്ഡിങ്ടണ് മലയാളി അസോസിയേഷന് ക്രിസ്മസ്-ന്യൂ ഇയര് ആഘോഷം നടത്തി. സട്ടന് കോര്ഡ്ഫീല്ഡ് സെന്റ് ചാഡ്സ് ഹാളിലാണ് ആഘോഷം നടത്തിയത്. ആഘോഷത്തിന്റെ ഭാഗമായുള്ള മൂന്ന് ഏരിയ തിരിച്ചു കരോള് കോമ്പറ്റീഷന് കാണികള്ക്ക് ആവേശം പകര്ന്നു. അതനുസരിച്ച് യഥാക്രമം കിങ്സ്ബറി ഏരിയ ഒന്നാം സ്ഥാനവും സെന്ട്രല് ഏരിയ രണ്ടാം സ്ഥാനവും പെറി കോമണ് ഏരിയ മൂന്നാം സ്ഥാനവും പങ്കിട്ടു.
പ്രസിഡന്റ് ജോര്ജ് മാത്യുവിന്റെ അധ്യക്ഷതയില് നടന്ന മെമ്പേഴ്സിന്റെ യോഗം നിലവിളക്ക് കൊളുത്തി ഉദ്ഘാടനം ചെയ്തു, ഈ സമ്മേളനത്തില് സെക്രട്ടറി ഡിജോ ജോണ് സ്വാഗതവും ജോയിന്റ് സെക്രട്ടറി ജിനേഷ് സി മനയില് നന്ദിയും പ്രകാശിപ്പിച്ചു. പ്രസിഡന്റ് തന്റെ പ്രസംഗത്തില് ക്രിസ്മസ് ന്യൂ ഇയറിന്റെ സന്ദേശവും അറിയിച്ചു.
ഏര്ഡിങ്ടണ് ബാന്ഡിന്റെ മനോഹരമായ സംഗീതം, കുട്ടികളുടെ അതിമനോഹരമായ കലാപരിപാടികള്, വിഭവസമൃദ്ധമായ വിരുന്ന് എന്നിവ ചേര്ന്ന് ആഘോഷത്തിന് മാറ്റ് കൂട്ടി. |