ലേലത്തില്‍ 40 കോടി രൂപയ്ക്ക് വിറ്റ് ഗിന്നസ് റെക്കോര്‍ഡ് നേടി ഇന്ത്യന്‍ ഇനമായ നെല്ലൂര്‍ പശു. ബ്രസീലിലെ മിനാസ് ഗെറൈസില്‍ നടന്ന ലേലത്തിലാണ് ഇത്രയും ഉയര്‍ന്ന തുകയ്ക്ക് പശുവിനെ വിറ്റത്.
1,101 കിലോഗ്രാമാണ് ഈ പശുവിന്റെ ഭാരം. ഇതുവരെ വിറ്റതില്‍ വച്ച് ഏറ്റവും വിലയേറിയ പശുവായ നെല്ലൂര്‍ വിറ്റുപോയത് 4.8 മില്യണ്‍ ഡോളറിനാണ് (ഏകദേശം 40 കോടി രൂപ).വിയറ്റിന-19 എന്നു പേരുള്ള ഇതിന് സാധാരണ നെല്ലൂര്‍ പശുക്കളുടെ രണ്ടു മടങ്ങ് ഭാരമാണുള്ളത്. ആന്ധ്രാപ്രദേശിലെ ഓങ്കോള്‍ മേഖലയാണ് ഇവയുടെ സ്വദേശം ,ഇതിനാല്‍ തന്നെ ഓങ്കോള്‍ ഇനം എന്നും ഇവയെ അറിയപ്പെടുന്നു.

അസാധാരണമായ ജനിതകശാസ്ത്രവും ശ്രദ്ധേയമായ ശാരീരിക സവിശേഷതകളും കാരണം ഇവ ആഗോളതലത്തില്‍ പോലും അംഗീകാരം നേടിയിട്ടുണ്ട്. ടെക്‌സാസിലെ ഫോര്‍ട്ട് വര്‍ത്തില്‍ നടന്ന ''ചാമ്പ്യന്‍ ഓഫ് ദി വേള്‍ഡ്'' മത്സരത്തില്‍ വിയറ്റിന-19 മിസ് സൗത്ത് അമേരിക്ക കിരീടം സ്വന്തമാക്കിയിട്ടുണ്ട്.

നെല്ലൂര്‍ പശുക്കളെ ലോകത്ത് ഏറ്റവുമധികം ഉല്‍പാദിപ്പിക്കുന്നത് ബ്രസീലിലാണ്.1800-കളില്‍ ബ്രസീലിലെ കന്നുകാലി വ്യവസായം ആരംഭിച്ചതുമുതല്‍ നെല്ലൂര്‍ പശുക്കള്‍ ഒരു നിര്‍ണായക ഘടകമാണ്.അതിതീവ്ര താപനിലയെ നേരിടാനുള്ള കഴിവും, രോഗ പ്രതിരോധശേഷിയും, ചിലവ് കുറഞ്ഞ പരിപാലനവും ഇവയുടെ സവിശേഷതയാണ്. ഇവയൊക്കെയാണ് വിയറ്റിന-19 ആഗോളതലത്തില്‍ പോലും ഏറെ പ്രിയപ്പെട്ടതാകുന്നത്.