ചെന്നൈ: വാര്‍ഷിക ബോണസായി പണവും ഷെയറും സമ്മാനങ്ങളും നല്‍കുന്നത് സാധാരണമാണ്. എന്നാല്‍ ചെന്നൈ ആസ്ഥാനമായ റിയല്‍ എസ്റ്റേറ്റ് കമ്പനിയായ കാസഗ്രാന്‍ഡ്, ജീവനക്കാരെ ലണ്ടനിലേക്ക് യാത്രയ്ക്കയച്ചുകൊണ്ടാണ് ലാഭവിഹിതം പങ്കുവെച്ചത്. വാര്‍ഷിക റിവാര്‍ഡ് പ്രോഗ്രാമിന്റെ ഭാഗമായി, കമ്പനി സ്വന്തം ചെലവില്‍ ഒരാഴ്ച നീണ്ടുനില്‍ക്കുന്ന യാത്രയ്ക്ക് 1,000 ജീവനക്കാരെ അയയ്ക്കുമെന്ന് പ്രഖ്യാപിച്ചു.
- എല്ലാ വര്‍ഷവും കമ്പനി ഇത്തരത്തിലുള്ള യാത്രകളാണ് ബോണസായി നല്‍കുന്നത്.
- ഇതുവരെ 6,000-ത്തിലധികം ജീവനക്കാര്‍ക്ക് സിംഗപ്പൂര്‍, തായ്ലന്‍ഡ്, മലേഷ്യ, ദുബായ്, സ്പെയിന്‍ തുടങ്ങിയ രാജ്യങ്ങളിലേക്ക് യാത്ര ചെയ്യാന്‍ അവസരം ലഭിച്ചതായി കമ്പനി അറിയിച്ചു.
- യാത്രകള്‍ ജീവനക്കാരുടെ കാഴ്ചപ്പാടുകള്‍ മാറ്റിമറിക്കുകയും, കമ്പനിയില്‍ തങ്ങളുടെ സ്ഥാനം മനസ്സിലാക്കാന്‍ സഹായിക്കുകയും ചെയ്തതായി ജീവനക്കാര്‍ പറയുന്നു.
കമ്പനിയുടെ നേട്ടങ്ങള്‍ക്ക് പിന്നില്‍ ജീവനക്കാരാണെന്നും, വിജയങ്ങള്‍ അവരോടൊപ്പം ആഘോഷിക്കണമെന്നതാണ് കമ്പനിയുടെ നയമെന്നും പ്രസ്താവനയില്‍ വ്യക്തമാക്കി. ഇന്ത്യയിലെയും ദുബായിലെയും ഓഫീസുകളില്‍ നിന്നുള്ള ജീവനക്കാരെ ഒരുമിച്ച് ലണ്ടനിലേക്ക് കൊണ്ടുപോകും.
യാത്രാ പരിപാടിയില്‍ ഉള്‍പ്പെടുന്ന പ്രധാന ആകര്‍ഷണങ്ങള്‍:
- വിന്‍ഡ്സര്‍ കാസിലിലൂടെ ഓഡിയോ ഗൈഡഡ് ടൂര്‍
- കാംഡന്‍ തെരുവുകളും മാര്‍ക്കറ്റുകളും സന്ദര്‍ശനം
- ഇന്റര്‍കോണ്ടിനെന്റല്‍ ലണ്ടനില്‍ ഗാല ഡിന്നര്‍
- സെന്റ് പോള്‍സ് കത്തീഡ്രല്‍, ലണ്ടന്‍ പാലസ്, ബിഗ് ബെന്‍, ബക്കിംഗ്ഹാം പാലസ്, പിക്കാഡിലി സര്‍ക്കസ്, ട്രാഫല്‍ഗര്‍ സ്‌ക്വയര്‍ സന്ദര്‍ശനം
- മാഡം തുസാഡ്സ് മ്യൂസിയം സന്ദര്‍ശനം
- തേംസ് നദിയിലൂടെയുള്ള ക്രൂയിസ് യാത്ര
ലണ്ടന്‍ യാത്രയോടെ വാര്‍ഷിക റിവാര്‍ഡ് പ്രോഗ്രാം സമാപിക്കുമെന്ന് കമ്പനി അറിയിച്ചു.
