ലണ്ടന്‍: ബലാത്സംഗം, ലൈംഗികാതിക്രമം എന്നീ കുറ്റങ്ങളില്‍ ബ്രിട്ടീഷ് നടനും ഹാസ്യതാരവുമായ റസല്‍ ബ്രാന്‍ഡിന് പത്ത് വര്‍ഷവും ആറുമാസവും തടവ്. ലണ്ടനിലെ സൗത്ത്വാര്‍ക്ക് ക്രൗണ്‍ കോടതിയാണ് നവംബര്‍ ഒന്‍പതിന് ശിക്ഷ വിധിച്ചത്. ഒരു സ്ത്രീയെ ബലാത്സംഗം ചെയ്തതിനും മറ്റ് മൂന്ന് സ്ത്രീകള്‍ക്കെതിരെ ലൈംഗികാതിക്രമം നടത്തിയതിനുമാണ് 51കാരനായ ബ്രാന്‍ഡ് കുറ്റക്കാരനാണെന്ന് കണ്ടെത്തിയത്. 2004 മുതല്‍ 2009 വരെയുള്ള സംഭവങ്ങളുമായി ബന്ധപ്പെട്ട കേസില്‍ നാലാഴ്ച നീണ്ട വിചാരണയ്ക്കുശേഷമാണ് ജൂറി കുറ്റക്കാരനാണെന്ന് വിധിച്ചത്. അതേസമയം, മറ്റ് രണ്ട് ബലാത്സംഗക്കുറ്റങ്ങളിലും ലൈംഗികാതിക്രമശ്രമവുമായി ബന്ധപ്പെട്ട ഒരു കുറ്റത്തിലും ബ്രാന്‍ഡിനെ കുറ്റവിമുക്തനാക്കി.
പ്രശസ്തി എന്തും ചെയ്യാനുള്ള അനുമതിയാണെന്ന രീതിയിലായിരുന്നു ബ്രാന്‍ഡിന്റെ പെരുമാറ്റമെന്ന് ശിക്ഷ പ്രഖ്യാപിച്ച ജഡ്ജി ജോയല്‍ ബെനത്തന്‍ വിമര്‍ശിച്ചു. സ്ത്രീകളുടെ സമ്മതത്തെ അവഗണിച്ച നടപടികളെയും കോടതി അപലപിച്ചു. ശിക്ഷയുടെ മൂന്നില്‍ രണ്ടുഭാഗം ജയിലില്‍ കഴിഞ്ഞശേഷമേ നിബന്ധനകളോടെയുള്ള മോചനത്തിന് അര്‍ഹത ലഭിക്കൂ. ബ്രാന്‍ഡിന്റെ പേര് ലൈംഗിക കുറ്റവാളികളുടെ രജിസ്റ്ററില്‍ ജീവിതകാലം മുഴുവന്‍ ഉള്‍പ്പെടുത്തും. തെളിവുകള്‍ ശേഖരിക്കുകയും കോടതിയില്‍ മൊഴിനല്‍കിയ സ്ത്രീകള്‍ക്ക് പിന്തുണ ഉറപ്പാക്കുകയും ചെയ്ത അന്വേഷണസംഘത്തെ ജഡ്ജി അഭിനന്ദിച്ചതായി മെട്രോപൊളിറ്റന്‍ പൊലീസ് അറിയിച്ചു.
