തിരുവനന്തപുരം: വയനാട് ദുരിതാശ്വാസത്തിനായി കോണ്‍ഗ്രസ് എത്ര പിരിച്ചു എന്ന ചോദ്യമാണ് ഇപ്പോള്‍ കേരള രാഷ്ട്രീയത്തിലെ ചൂടന്‍ ചര്‍ച്ച. നിയമസഭാ തെരഞ്ഞെടുപ്പിന് ദിവസങ്ങള്‍ മാത്രം ശേഷിക്കെ, കെപിസിസി പ്രസിഡന്റ് സണ്ണി ജോസഫ് അവതരിപ്പിച്ച കണക്കുകള്‍ കോണ്‍ഗ്രസിനെ പ്രതിരോധത്തിലാക്കി.

സണ്ണി ജോസഫ് വാര്‍ത്താസമ്മേളനത്തില്‍ പറഞ്ഞത് പ്രകാരം, കോണ്‍ഗ്രസ് പിരിച്ചത് 5 കോടി 38 ലക്ഷം രൂപയും ചെലവായത് 7 കോടിയിലേറെയുമാണ്. എന്നാല്‍ സോഷ്യല്‍ മീഡിയയില്‍ പ്രചരിക്കുന്ന സ്റ്റാന്‍ഡ് വിത്ത് വയനാട് ആപ്പിന്റെ സ്‌ക്രീന്‍ഷോട്ടുകള്‍ 54 കോടി രൂപയാണ് കാണിക്കുന്നത്. ഇതോടെ കോണ്‍ഗ്രസിന്റെ കണക്കുകളില്‍ പൊരുത്തക്കേടുണ്ടെന്ന ആരോപണം ശക്തമായി.

ഇടതു മുന്നണി നേതാക്കള്‍ കോണ്‍ഗ്രസിന്റെ കണക്കുകള്‍ ചോദ്യം ചെയ്തപ്പോള്‍, സിപിഎം ദുരിതാശ്വാസത്തിനായി പിരിച്ച 92.99 ലക്ഷം രൂപ മുഖ്യമന്ത്രിയുടെ ദുരിതാശ്വാസ നിധിയിലേക്ക് കൈമാറിയതിന്റെ രേഖകള്‍ പുറത്തുവിട്ടു. ഡിവൈഎഫ്ഐ 20 കോടി രൂപ സമാഹരിച്ച് ദുരിതാശ്വാസ നിധിയിലേക്ക് നല്‍കിയതിന്റെ വിശദവിവരങ്ങളും പ്രസിദ്ധീകരിച്ചു. മുസ്ലിം ലീഗ് 36 കോടി രൂപ പിരിച്ച് വീടുകള്‍ നിര്‍മ്മിച്ച് പൂര്‍ത്തിയാക്കിയതായും രേഖകള്‍ പുറത്തുവന്നു.



പ്രധാന ചോദ്യങ്ങള്‍

കോണ്‍ഗ്രസ് പിരിച്ചത് 5 കോടി മാത്രമാണോ?

മുസ്ലിം ലീഗും ഡിവൈഎഫ്ഐയും കോടികളില്‍ പിരിച്ച് വീടുകള്‍ നിര്‍മ്മിച്ചപ്പോള്‍, കോണ്‍ഗ്രസിന്റെ പിരിവ് 5 കോടിയില്‍ ഒതുങ്ങുന്നതു വിശ്വസനീയമാണോ എന്നതാണ് വിമര്‍ശനം.



ഭൂമി വാങ്ങിയതിന്റെ കണക്കുകള്‍ വ്യക്തമല്ല:

സണ്ണി ജോസഫ് അവതരിപ്പിച്ച കണക്കുകള്‍ പ്രകാരം, 3 ഏക്കറും 24 സെന്റും ഭൂമിക്ക് 3.68 കോടി രൂപയും, 2 ഏക്കര്‍ 18 സെന്റിന് 2.50 കോടി രൂപയും ചെലവായതായി പറയുന്നു. എന്നാല്‍ ഏത് ഭൂമിയാണ് വാങ്ങിയതെന്നോ, വില യാഥാര്‍ഥ്യമാണോ എന്നോ വ്യക്തമല്ല.



ആപ്പ് വഴി പിരിച്ച തുക:

വി.ഡി. സതീശന്‍ പറഞ്ഞത് ആവശ്യത്തിന് തുക ലഭിച്ചതിനാല്‍ ആപ്പ് പിന്‍വലിച്ചുവെന്നാണ്. എന്നാല്‍ 54 കോടി രൂപ പിരിച്ചുവെന്ന സ്‌ക്രീന്‍ഷോട്ടുകള്‍ പുറത്തുവന്ന സാഹചര്യത്തില്‍, കോണ്‍ഗ്രസിന്റെ മാസ്റ്റര്‍ പ്ലാന്‍ എവിടെയെന്ന ചോദ്യമാണ് ഉയര്‍ന്നിരിക്കുന്നത്.