തിരുവനന്തപുരം: മൂന്ന് ബിയര്‍-വൈന്‍ പാര്‍ലറുകള്‍ക്ക് ബാര്‍ ലൈസന്‍സ് അനുവദിച്ചതുമായി ബന്ധപ്പെട്ട് രണ്ട് എക്സൈസ് ഡെപ്യൂട്ടി കമ്മിഷണര്‍മാരെ സസ്‌പെന്‍ഡ് ചെയ്ത നടപടി സ്റ്റേ ചെയ്യാന്‍ കേരള അഡ്മിനിസ്‌ട്രേറ്റീവ് ട്രൈബ്യൂണല്‍ വിസമ്മതിച്ചതായി റിപ്പോര്‍ട്ട്. എറണാകുളം ഡെപ്യൂട്ടി കമ്മിഷണര്‍ പി.കെ. സതീഷും കോട്ടയം ജില്ലയുടെ അധിക ചുമതല വഹിച്ചിരുന്ന പത്തനംതിട്ട ഡെപ്യൂട്ടി കമ്മിഷണര്‍ പി.എല്‍. ഷിബുവുമാണ് സസ്പെന്ഷന് നേരിടുന്നത്.
മൂവാറ്റുപുഴ, കൊച്ചി, പാലാ എന്നിവിടങ്ങളിലെ ബിയര്‍-വൈന്‍ പാര്‍ലറുകള്‍ക്ക് ബാര്‍ ലൈസന്‍സ് അനുവദിച്ചതാണ് വിവാദമായത്. പുതിയ മദ്യനയം പ്രഖ്യാപിക്കുന്നതുവരെ ബാര്‍ ലൈസന്‍സ് നല്‍കരുതെന്ന സര്‍ക്കാര്‍ നിര്‍ദേശം ഉദ്യോഗസ്ഥര്‍ മറികടന്നുവെന്നാണ് എക്സൈസ് മന്ത്രി എം. ലിജുവിന്റെ നിലപാട്. മന്ത്രിയുടെ നിര്‍ദേശത്തെ തുടര്‍ന്നാണ് ഇരുവരെയും സസ്‌പെന്‍ഡ് ചെയ്തത്.
അതേസമയം, നിലവിലുള്ള ചട്ടങ്ങള്‍ അനുസരിച്ചാണ് ഉദ്യോഗസ്ഥര്‍ ലൈസന്‍സ് അനുവദിച്ചതെന്ന് എക്സൈസ് കമ്മിഷണര്‍ എസ്. സാംബശിവ റാവു സര്‍ക്കാരിന് റിപ്പോര്‍ട്ട് നല്‍കിയിരുന്നു. മുന്‍ മദ്യനയത്തില്‍ ബാര്‍ ലൈസന്‍സ് നഷ്ടപ്പെട്ട ഹോട്ടലുകള്‍ക്ക് ത്രീ സ്റ്റാറോ അതിനു മുകളിലോ പദവി ലഭിച്ചാല്‍ വീണ്ടും ലൈസന്‍സ് അനുവദിക്കാമെന്ന വ്യവസ്ഥയാണ് കമ്മിഷണര്‍ ചൂണ്ടിക്കാട്ടിയത്.
