തിരുവനന്തപുരം: വിദേശ സംഭാവന സ്വീകരിക്കല് നിയന്ത്രണ നിയമം (എഫ്സിആര്ഐ) ഭേദഗതി ബില്ലുമായി മുന്നോട്ട് പോകുന്നതില് നിന്ന് കേന്ദ്രം പിന്തിരിയണമെന്ന് ആവശ്യപ്പെട്ട് സംസ്ഥാന സര്ക്കാര് പ്രധാനമന്ത്രിക്ക് കത്തയച്ചു.
മുഖ്യമന്ത്രി പിണറായി വിജയന് അറിയിച്ചു: ''ഭേദഗതി ബില്ലിലെ ചില വ്യവസ്ഥകള് രാജ്യത്തെ ന്യൂനപക്ഷ വിഭാഗങ്ങള്ക്കും വിവിധ മതസ്ഥാപനങ്ങള്ക്കും വലിയ ആശങ്കകള് സൃഷ്ടിച്ചിരിക്കുകയാണ്. അനുമതി പുതുക്കുന്നതിനുള്ള അപേക്ഷ നിരസിക്കപ്പെട്ടാലോ, കാലാവധിക്കുള്ളില് പുതുക്കല് ലഭ്യമാകാതെയായാലോ രജിസ്ട്രേഷന് സര്ട്ടിഫിക്കറ്റ് റദ്ദാക്കിയതായി കണക്കാക്കുമെന്നതാണ് പുതിയ വ്യവസ്ഥ.''
ഭേദഗതി പ്രകാരം സാങ്കേതിക കാരണങ്ങള് കൊണ്ടുപോലും രജിസ്ട്രേഷന് റദ്ദാക്കപ്പെടുകയും ആസ്തികള് ഏറ്റെടുക്കപ്പെടുകയും ചെയ്യുന്ന സാഹചര്യം ഉണ്ടാകുമെന്ന് മുഖ്യമന്ത്രി ചൂണ്ടിക്കാട്ടി. രാജ്യത്തിന്റെ വിവിധ ഭാഗങ്ങളില് മത ന്യൂനപക്ഷങ്ങളുടെ ആരാധനാലയങ്ങള്ക്കെതിരെ നടക്കുന്ന ആക്രമണങ്ങളുടെ പശ്ചാത്തലത്തില് ഉയരുന്ന ആശങ്കകള് യുക്തിസഹവും ഗൗരവമുള്ളതുമാണെന്നും അദ്ദേഹം പറഞ്ഞു. ന്യൂനപക്ഷ വിഭാഗങ്ങള് ഉള്പ്പെടെ മുന്നോട്ട് വെച്ച ആശങ്കകള് പരിഹരിച്ച ശേഷമേ ബില്ലിന്റെ തുടര് നടപടികള് സ്വീകരിക്കാവൂ. കേന്ദ്രം ഭേദഗതിയുമായി മുന്നോട്ട് പോകുന്നതില് നിന്ന് പിന്തിരിയണമെന്ന് സംസ്ഥാന സര്ക്കാര് ശക്തമായി ആവശ്യപ്പെട്ടതായി മുഖ്യമന്ത്രി വ്യക്തമാക്കി.
