ലണ്ടന്: ഫ്രാന്സിലെ കലായിസ് തീരത്ത് നിന്ന് ഇംഗ്ലീഷ് ചാനല് കടക്കാന് ശ്രമിച്ച നാല് കുടിയേറ്റക്കാരുടെ ജീവന് ദാരുണാന്ത്യം കണ്ടു. കഴിഞ്ഞ വ്യാഴാഴ്ച ചെറിയ ബോട്ടില് കയറുന്നതിനിടെയാണ് രണ്ട് പുരുഷന്മാരും രണ്ട് സ്ത്രീകളും മുങ്ങി മരിച്ചത്. അപകടവുമായി ബന്ധപ്പെട്ട് 27 കാരനായ സുഡാനി പൗരനെ അറസ്റ്റ് ചെയ്തതായി ബ്രിട്ടീഷ് നാഷണല് ക്രൈം ഏജന്സി (NCA) അറിയിച്ചു. പ്രതിയെ കെന്റിലെ മാന്സ്റ്റണ് പ്രോസസ്സിംഗ് സെന്ററില് നിന്നാണ് പിടികൂടിയത്.
മുപ്പത്തിയെട്ട് പേരെ ഫ്രഞ്ച് തീരത്തേക്ക് തിരിച്ചയച്ചപ്പോള്, 74 പേര് യുകെയിലേക്ക് കടന്നതായി എന്സിഎ വ്യക്തമാക്കി. യാത്രക്കാരെ ചോദ്യം ചെയ്യുന്നതിനുള്ള നടപടികള് പുരോഗമിക്കുകയാണ്. ഫ്രഞ്ച് പ്രോസിക്യൂട്ടര്മാര് അപകടത്തിന്റെ സാഹചര്യങ്ങള് അന്വേഷിക്കുമ്പോള്, ഫ്രഞ്ച് പോലീസിനൊപ്പം എന്സിഎയും സഹകരിക്കുന്നു. ''ചാനലിലെ ഓരോ മരണവും ഒരു ദുരന്തമാണ്. ഉത്തരവാദികളായവരെ നീതിപീഠത്തിലേക്ക് കൊണ്ടുവരാന് കഴിയുന്നതെല്ലാം ചെയ്യും,'' എന്ന് എന്സിഎ ഡെപ്യൂട്ടി ഡയറക്ടര് ക്രെയ്ഗ് ടര്ണര് പറഞ്ഞു. മൈഗ്രേഷന് മന്ത്രി മൈക്ക് ടാപ്പ് അനധികൃത കുടിയേറ്റം തടയുന്നതിന് ഫ്രഞ്ച് അധികാരികളുമായി ചേര്ന്ന് നടത്തുന്ന പ്രവര്ത്തനങ്ങള് തുടരുന്നതായി വ്യക്തമാക്കി. മനുഷ്യക്കടത്ത് നടത്തുന്ന സംഘങ്ങള്ക്കെതിരെ കര്ശന നടപടികളുടെ ഭാഗമായാണ് അറസ്റ്റ് നടന്നതെന്നും അദ്ദേഹം കൂട്ടിച്ചേര്ത്തു.
