ചോക്ലേറ്റ് ഇഷ്ടപ്പെടാത്തവര്‍ ചുരുക്കമായിരിക്കും. അതിനി കുട്ടികളാണെങ്കിലും മുതിര്‍ന്നവരാണെങ്കിലും. പല ഫ്‌ലേവറുകളിലും ചോക്ലേറ്റുകള്‍ ലഭിക്കാറുണ്ട്. അടുത്തിടെ ഐവറി കോസ്റ്റില്‍ നിന്നുള്ള ചില കൊക്കോ കര്‍ഷകര്‍ ആദ്യമായി ചോക്ലേറ്റ് രുചിച്ച് നോക്കുന്നതിന്റെ ഒരു വീഡിയോ സോഷ്യല്‍ മീഡിയയില്‍ വൈറലായി മാറിയിരുന്നു. ലോകത്തിലെ മൊത്തം ഉല്‍പാദനത്തിന്റെ 45 ശതമാനം കൊക്കോയും ഐവറി കോസ്റ്റിലാണ് ഉത്പാദിപ്പിക്കുന്നത്. ഇവിടുത്തെ കൊക്കോ കര്‍ഷകര്‍ ദിവസവും അധ്വാനിക്കുന്നവരാണ്. എന്നാല്‍, അവരൊന്നും തന്നെ ചോക്ലേറ്റ് കഴിച്ചിട്ടില്ല എന്നാണ് ഈ വീഡിയോ കാണുമ്പോള്‍ മനസിലാവുന്നത്. വീഡിയോയില്‍ കൊക്കോ കര്‍ഷകനായ അല്‍ഫോണ്‍സോ എന്നൊരാളെയാണ് ആദ്യം കാണുന്നത്. അദ്ദേഹത്തോട് ഒരാള്‍ ഇവ എന്തിനാണ് ഉപയോ?ഗിക്കുന്നത് എന്ന് അറിയുമോ എന്ന് ചോദിക്കുന്നുണ്ട്. അല്‍ഫോണ്‍സോയുടെ മറുപടി നല്ല ഭക്ഷണസാധനങ്ങളുണ്ടാക്കാനാണ് എന്ന് കേട്ടിട്ടുണ്ട്, പക്ഷേ ഇതുവരെ കഴിച്ചിട്ടില്ല എന്നാണ്.
എന്നാല്‍, തന്റെ കയ്യില്‍ ഒരു സര്‍പ്രൈസ് ഉണ്ട് എന്നും പറഞ്ഞ് അല്‍ഫോണ്‍സോയ്ക്ക് അയാള്‍ ചോക്ലേറ്റ് വച്ചുനീട്ടുന്നതും കാണാം. അല്‍ഫോണ്‍സോ ആ ചോക്ലേറ്റ് രുചിച്ച് നോക്കുന്നു. ഇത് നല്ല മധുരമുണ്ടല്ലോ എന്നാണ് അദ്ദേഹത്തിന്റെ പ്രതികരണം. അദ്ദേഹത്തിന് അത് ഇഷ്ടമായി എന്നാണ് വീഡിയോയില്‍ നിന്നും മനസിലാവുന്നത്. വേറെയും കുറച്ച് കര്‍ഷകര്‍ക്ക് ചോക്ലേറ്റ് നല്‍കുന്നത് കാണാം. ചോക്ലേറ്റ് നല്ല മധുരമുണ്ട് എന്നാണ് കര്‍ഷകരുടെ പ്രതികരണം. @spottedhyacinth എന്ന യൂസറാണ് വീഡിയോ ഇന്‍സ്റ്റ?ഗ്രാമില്‍ പോസ്റ്റ് ചെയ്തിരിക്കുന്നത്. 'ഐവറി കോസ്റ്റിലെ ഒരു കൊക്കോ കര്‍ഷകന്‍ ആദ്യമായി ചോക്ലേറ്റ് രുചിച്ചു നോക്കുന്ന ഈ ക്ലിപ്പ് ഞാന്‍ ഒരിക്കലും മറക്കില്ല' എന്ന കാപ്ഷനോടെയാണ് വീഡിയോ പോസ്റ്റ് ചെയ്തിരിക്കുന്നത്. നിരവധിപ്പേരാണ് ഈ വീഡിയോയ്ക്ക് കമന്റുകള്‍ നല്‍കിയത്. അതേസമയം, ഈ രാജ്യം സ്വന്തമായി ബിസിനസ് ചെയ്യണമെന്നും ഈ കര്‍ഷകരെ മെച്ചപ്പെട്ട അവസ്ഥയിലേക്കെത്തിക്കണം എന്നും കമന്റുകള്‍ നല്‍കിയവരും ഏറെയാണ്.
