ന്യൂഡല്‍ഹി: ഓള്‍ ഇന്ത്യ തൃണമൂല്‍ കോണ്‍ഗ്രസിന്റെ ചിഹ്നത്തര്‍ക്കത്തില്‍ ഋതബ്രത ബാനര്‍ജിയുടെ നേതൃത്വത്തിലുള്ള വിഭാഗം നാലാഴ്ചയ്ക്കകം മറുപടി സത്യവാങ്മൂലം സമര്‍പ്പിക്കണമെന്ന് സുപ്രീംകോടതി. മറുപടി സമര്‍പ്പിച്ചതിനുശേഷം മൂന്നുമാസത്തിനുള്ളില്‍ തര്‍ക്കത്തില്‍ തീരുമാനമെടുക്കാന്‍ തെരഞ്ഞെടുപ്പ് കമ്മീഷനും കോടതി നിര്‍ദേശം നല്‍കി. ബംഗാള്‍ നിയമസഭാ ഉപതെരഞ്ഞെടുപ്പ് നടക്കാനിരിക്കെ പാര്‍ട്ടി ചിഹ്നം മരവിപ്പിച്ച തെരഞ്ഞെടുപ്പ് കമ്മീഷന്റെ ഉത്തരവിനെതിരെ മുന്‍ മുഖ്യമന്ത്രിയും തൃണമൂല്‍ നേതാവുമായ മമത ബാനര്‍ജി നല്‍കിയ ഹര്‍ജി പരിഗണിക്കവെയാണ് നിര്‍ദേശം. ചിഹ്നത്തിന്റെ അവകാശം സംബന്ധിച്ച തര്‍ക്കത്തില്‍ അന്തിമ തീരുമാനമുണ്ടാകുന്നതുവരെ താല്‍ക്കാലിക നടപടിയായാണ് കമ്മീഷന്‍ ചിഹ്നം മരവിപ്പിച്ചത്.
മമത ബാനര്‍ജിയുടെ വിഭാഗം ഇതിനകം മറുപടി സമര്‍പ്പിച്ചിട്ടുണ്ടെങ്കിലും എതിര്‍വിഭാഗത്തിന്റെ മറുപടി ലഭിക്കാനുണ്ടെന്ന് കോടതി നിരീക്ഷിച്ചു. തുടര്‍ന്നാണ് ഋതബ്രത ബാനര്‍ജി വിഭാഗത്തിന് നാലാഴ്ച സമയം അനുവദിച്ചത്. സമാനമായ ചിഹ്നത്തര്‍ക്കങ്ങളില്‍ മുന്‍കാലങ്ങളില്‍ തീരുമാനമെടുക്കാന്‍ വേണ്ടിവന്ന സമയം വ്യക്തമാക്കുന്ന പട്ടിക തെരഞ്ഞെടുപ്പ് കമ്മീഷന്‍ കോടതിയില്‍ സമര്‍പ്പിച്ചു. ഇത്തരം തര്‍ക്കങ്ങള്‍ കൈകാര്യം ചെയ്യുന്നത് ആദ്യമായല്ലെന്നും നിലവിലെ വിഷയത്തിലും സമാനമായ സമയപരിധിക്കുള്ളില്‍ തീരുമാനമെടുക്കാനാകുമെന്നും കമ്മീഷന്‍ അറിയിച്ചു. തര്‍ക്കത്തിന്റെ ഉള്ളടക്കത്തില്‍ മറ്റ് അഭിപ്രായങ്ങളൊന്നും പ്രകടിപ്പിക്കുന്നില്ലെന്നും സുപ്രീംകോടതി വ്യക്തമാക്കി.
