ലണ്ടന്‍: ബ്രിട്ടീഷ് പ്രധാനമന്ത്രിയുടെ ഔദ്യോഗിക വസതിയായ 10 ഡൗണിങ് സ്ട്രീറ്റില്‍ ദീപാവലി ആഘോഷിച്ചു. പ്രധാനമന്ത്രി ആന്‍ഡി ബേണ്‍ഹാമും ഭാര്യ മാരി-ഫ്രാന്‍സ് വാന്‍ ഹീലും ഇന്ത്യന്‍ സമൂഹത്തിന്റെ പ്രതിനിധികള്‍ക്കൊപ്പം മണ്‍വിളക്കുകള്‍ തെളിച്ച് ചടങ്ങില്‍ പങ്കെടുത്തു. രാഷ്ട്രീയനേതാക്കളും സംരംഭകരും വിവിധ മേഖലകളിലെ പ്രമുഖരും സ്വീകരണത്തിനെത്തി. പ്രധാനമന്ത്രിയായശേഷമുള്ള ആദ്യ ദീപാവലി ആഘോഷത്തില്‍ ഇന്ത്യയുമായുള്ള ബന്ധം കൂടുതല്‍ ശക്തമാക്കുമെന്ന് ബേണ്‍ഹാം വ്യക്തമാക്കി. ബ്രിട്ടന്റെ സാമൂഹിക, സാമ്പത്തിക, സാംസ്‌കാരിക വളര്‍ച്ചയില്‍ ഇന്ത്യന്‍ വംശജര്‍ നല്‍കുന്ന സംഭാവനകളെ അദ്ദേഹം പ്രശംസിച്ചു. വിവിധ മതവിഭാഗങ്ങളുടെ പങ്കാളിത്തം രാജ്യത്തിന്റെ പ്രത്യേകതയാണെന്നും പറഞ്ഞു.
യുവാക്കള്‍ അവതരിപ്പിച്ച ഹനുമാന്‍ ചാലിസ ആലാപനവും ഭഗവദ്ഗീതാ പാരായണവും ചടങ്ങിന്റെ ഭാഗമായി. വാട്ട്‌ഫോര്‍ഡിലെ ഹരേ കൃഷ്ണ ക്ഷേത്രം പ്രസിഡന്റ് വിശാഖ ദാസി ഗീതയിലെ ഭാഗം അവതരിപ്പിച്ചു. ബി.എ.പി.എസ്. സ്വാമിനാരായണ്‍ സന്‍സ്ഥയുടെ പ്രതിനിധി ലോകസമാധാനത്തിനായുള്ള കവിതയും അവതരിപ്പിച്ചു. ആര്‍ട്ടിഫിഷ്യല്‍ ഇന്റലിജന്‍സ് മന്ത്രി കനിഷ്‌ക നാരായണാണ് പ്രധാനമന്ത്രിയെ സദസ്സിന് പരിചയപ്പെടുത്തിയത്. ഇന്ത്യ-ബ്രിട്ടന്‍ ബന്ധം നയതന്ത്രതലത്തില്‍ മാത്രമല്ല, ജനങ്ങള്‍ തമ്മിലുള്ള അടുപ്പത്തിലും അധിഷ്ഠിതമാണെന്ന സന്ദേശവും ചടങ്ങില്‍ ഉയര്‍ന്നു. 2009ല്‍ ഗോര്‍ഡന്‍ ബ്രൗണ്‍ പ്രധാനമന്ത്രിയായിരിക്കെയാണ് ഡൗണിങ് സ്ട്രീറ്റിലെ ഔദ്യോഗിക ദീപാവലി സ്വീകരണത്തിന് തുടക്കമായത്. പിന്നീട് ഡേവിഡ് കാമറൂണ്‍, തെരേസ മേ, റിഷി സുനക് തുടങ്ങിയവരും ഈ പാരമ്പര്യം തുടര്‍ന്നു.
