ലണ്ടന്‍ : സെപ്റ്റംബര്‍ വരെയുള്ള മൂന്ന് മാസങ്ങളില്‍ യുകെ സമ്പദ്വ്യവസ്ഥ പ്രതീക്ഷിച്ചതിലും കൂടുതല്‍ ചുരുങ്ങിയതായി കണക്കുകള്‍. 0.3% ചുരുങ്ങിയതായി ഓഫീസ് ഫോര്‍ നാഷണല്‍ സ്റ്റാറ്റിസ്റ്റിക്സ് പറഞ്ഞു. ഒരു രാജ്യത്തിന്റെ സമ്പദ്വ്യവസ്ഥ തുടര്‍ച്ചയായി രണ്ടോ മൂന്നോ മാസ കാലയളവിലേക്ക് ചുരുങ്ങുമ്പോള്‍ രാജ്യം മാന്ദ്യത്തിലാണെന്ന് കണക്കാക്കപ്പെടുന്നു. ശമ്പളം കുറയുന്നു, തൊഴിലില്ലായ്മ വര്‍ദ്ധിക്കുന്നു, ബിസിനസ് നിക്ഷേപം കുറയുന്നു തുടങ്ങിയവയാണ് പ്രശ്‌നങ്ങള്‍. ''പുതുക്കിയ കണക്കുകള്‍ പ്രകാരം കഴിഞ്ഞ വര്‍ഷം ഞങ്ങള്‍ കണക്കാക്കിയതിലും കുറവായിരുന്നു ഉത്പാദനം.'' ഒഎന്‍എസിലെ സാമ്പത്തിക സ്ഥിതിവിവരക്കണക്കുകളുടെ ഡയറക്ടര്‍ ഡാരന്‍ മോര്‍ഗന്‍ പറഞ്ഞു.കുതിച്ചുയരുന്ന ഊര്‍ജവും ഭക്ഷ്യവിലയും പണപ്പെരുപ്പം 40 വര്‍ഷത്തിനിടയിലെ ഏറ്റവും ഉയര്‍ന്ന നിലയിലേക്ക് രാജ്യത്തെ തള്ളിവിട്ടു.

കഴിഞ്ഞ ആഴ്ച, ഒഎന്‍എസില്‍ നിന്നുള്ള കണക്കുകള്‍ സൂചിപ്പിക്കുന്നത് , ഓഗസ്റ്റ് മുതല്‍ ഒക്ടോബര്‍ വരെയുള്ള കാലയളവില്‍ സമ്പദ്വ്യവസ്ഥ 0.3% ചുരുങ്ങി എന്നാണ്. യുകെ ഒരു വര്‍ഷത്തിലധികം നീണ്ടുനില്‍ക്കുന്ന മാന്ദ്യത്തിലേക്ക് വീഴുമെന്ന് ഓഫീസ് ഫോര്‍ ബജറ്റ് റെസ്പോണ്‍സിബിലിറ്റി (ഒബിആര്‍) മുന്നറിയിപ്പ് നല്‍കി.വളര്‍ച്ച ക്രമേണ വീണ്ടും ഉയരുന്നതിന് മുമ്പ് 2023 ല്‍ സമ്പദ്വ്യവസ്ഥ 1.4% ചുരുങ്ങുമെന്ന് അവര്‍ പ്രവചിച്ചു. ഇത് കാരണം കുതിച്ചുയരുന്ന വില നിയന്ത്രിക്കാന്‍ ബാങ്ക് ഓഫ് ഇംഗ്ലണ്ട് പലിശനിരക്ക് ഉയര്‍ത്തുന്നതിനാല്‍ തൊഴിലില്ലായ്മ നിരക്ക് ഉയരുമെന്നും വീടുകളുടെ വില കുത്തനെ കുറയുമെന്നും പ്രതീക്ഷിക്കുന്നു. കഴിഞ്ഞ ആഴ്ച, ബാങ്ക് പലിശ നിരക്ക് 3.5% ആയി ഉയര്‍ത്തി. ഇത് 14 വര്‍ഷത്തെ ഏറ്റവും ഉയര്‍ന്ന നിലയാണ്. ഇത് മോര്‍ട്ട്‌ഗേജുകളും വായ്പകളും ഉള്ള ആളുകളുടെ തിരിച്ചടവ് ചിലവ് വര്‍ദ്ധിപ്പിക്കുന്നു.