യുക്രെയ്‌നിലെ ഒഡേസ തീരത്ത് ചരക്കു കപ്പലിന് നേരെ റഷ്യ നടത്തിയ മിസൈലാക്രമണത്തില്‍ മലയാളി ഉള്‍പ്പെടെ 10 പേര്‍ കൊല്ലപ്പെട്ടു. കാസര്‍കോട് വെള്ളരിക്കുണ്ട് എകെജി നഗര്‍ സ്വദേശിയായ അഖില്‍ ജോയന്‍ (26) ആണ് മരിച്ച മലയാളി. ഇന്ത്യന്‍, സിറിയന്‍ നാവികരാണ് കപ്പലിലുണ്ടായിരുന്നത്.
'ഗോള്‍ഡന്‍ ലിയോ' എന്ന ഗിനിയ-ബിസാവു പതാകയുള്ള ചരക്കു കപ്പലിന് നേരെയാണ് റഷ്യന്‍ ക്രൂസ് മിസൈല്‍ പതിച്ചതെന്ന് യുക്രെയ്ന്‍ വ്യോമസേന അറിയിച്ചു.
കഴിഞ്ഞ കുറച്ച് ആഴ്ചകളായി ഒഡേസ മേഖല കേന്ദ്രീകരിച്ച് റഷ്യ ആക്രമണം ശക്തമാക്കിയിരിക്കുകയാണ്. ജൂലൈ മാസത്തില്‍ മാത്രം റഷ്യന്‍ ആക്രമണങ്ങളില്‍ 28 പേര്‍ കൊല്ലപ്പെട്ടതായി ഒഡേസ ഗവര്‍ണര്‍ ഒലെ കിപ്പര്‍ പറഞ്ഞു.