|
ജ്യോതിഷിയും ആത്മീയ ഉപദേശകനുമായ റിക്കി രാധന് പണ്ഡിറ്റിനെ മുഖ്യമന്ത്രിയുടെ 'ഓഫീസര് ഓണ് സ്പെഷ്യല് ഡ്യൂട്ടി' (ഒ.എസ്.ഡി - പൊളിറ്റിക്കല്) ആയി നിയമിച്ചുകൊണ്ടുള്ള ഉത്തരവ് തമിഴ്നാട് സര്ക്കാര് പിന്വലിച്ചു. മെയ് 12-നാണ് റിക്കി രാധന് പണ്ഡിറ്റിനെ നിയമിച്ചുകൊണ്ട് മുഖ്യമന്ത്രി വിജയ് ഉത്തരവ് പുറപ്പെടുവിച്ചത്. എന്നാല് ഈ തീരുമാനത്തിനെതിരെ പൊതുജനങ്ങളില് നിന്ന് ശക്തമായ പ്രതിഷേധം ഉയര്ന്നു.
മുഖ്യമന്ത്രിയുടെ ഒ എസ് ഡി ആയി സേവനമനുഷ്ഠിക്കാന് ആവശ്യമായ യോഗ്യതകള് റിക്കി പണ്ഡിറ്റിനില്ലെന്ന് വിമര്ശകര് വാദിക്കുന്നു. ഡിഎംകെ, വിസികെ, കമ്മ്യൂണിസ്റ്റ് പാര്ട്ടികള് ഉള്പ്പെടെയുള്ള പ്രതിപക്ഷ പാര്ട്ടികള് ഈ നീക്കത്തെ ശക്തമായി എതിര്ത്തിരുന്നു. ഡിഎംഡികെ നേതാവ് പ്രേമലത വിജയകാന്ത്, വിസികെ നേതാവ് വണ്ണി അരശ് തുടങ്ങിയവര് ഉള്പ്പെടെയുള്ള പ്രതിപക്ഷ പാര്ട്ടികള് നിയമസഭയില് തങ്ങളുടെ എതിര്പ്പ് രേഖപ്പെടുത്തിയതിനെത്തുടര്ന്ന്, നിയമന തീരുമാനത്തില് നിന്നും തമിഴ്നാട് സര്ക്കാര് പിന്മാറുകയായിരുന്നു. |
