സോഷ്യല് മീഡിയ സജീവമായതോടെ രസകരമായ ഓരോ വീഡിയോകളും ചിത്രങ്ങളും നാം കാണാറുണ്ട്. ചില വീഡിയോയൊക്കെ കാണുമ്പോള്, 'നിനക്ക് ഇതൊക്കെ എങ്ങനെ സാധിക്കുന്നെടാ' എന്ന് നമ്മള് ചോദിച്ചുപോകും. ഇത്തരം വീഡിയോ ചെയ്യുന്ന കാര്യത്തില് ഇന്ത്യക്കാര് ഒട്ടും പിന്നിലല്ല. 'ഇന്ത്യക്കാരുടെ ഒരു ബുദ്ധിയെ' എന്ന് ലോകത്തെക്കൊണ്ട് പറയിക്കാന് തക്കതായ പല കാര്യങ്ങളും അത്തരം വീഡിയോകളില് കാണാം. അതുപോലെ ഒരു വീഡിയോയാണ് ഇപ്പോള് വൈറലായിക്കൊണ്ടിരിക്കുന്ന ഈ വീഡിയോയും. ഒരാള് പ്രഷര് കുക്കര് കൊണ്ട് തന്റെ ഷര്ട്ട് ഇസ്തിരിയിടുന്ന വീഡിയോയാണ് വൈറലായിരിക്കുന്നത്. വീഡിയോയില് ഒരു വീടിന്റെ അടുക്കളയാണ് കാണുന്നത്. ഗ്യാസ് അടുപ്പില് ഒരു കുക്കര് വച്ചിട്ടുണ്ട്. നിലത്ത് വിരിച്ചിരിക്കുന്ന തുണിയില് ഒരു ചുവന്ന ഷര്ട്ട് ഇസ്തിരിയിടാന് വേണ്ടി വച്ചിരിക്കുന്നതും കാണാം.
പിന്നെ കാണുന്നത് ഒട്ടും പ്രതീക്ഷിക്കാത്ത കാഴ്ചയാണ്. യുവാവ് ഗ്യാസ് അടുപ്പില് നിന്നും ആവി പോയിക്കൊണ്ടിരിക്കുന്ന കുക്കര് എടുത്ത് വളരെ വേഗത്തില് ഷര്ട്ട് ഇസ്തിരിയിടുന്നു. ആദ്യം ഒരു ഭാഗം ഇസ്തിരിയിട്ട ശേഷം മറുഭാഗവും ഇസ്തിരിയിടുന്നതും കാണാം. എന്തായാലും, പ്രഷര് കുക്കര് കൊണ്ട് ഇസ്തിരിയിടാന് സാധിക്കുന്നുണ്ട് എന്നാണ് യുവാവിന്റെ വീഡിയോ കാണുമ്പോള് മനസിലാവുന്നത്. വളരെ പെട്ടെന്ന് തന്നെ വീഡിയോ ശ്രദ്ധ പിടിച്ചുപറ്റി. നിരവധിപ്പേരാണ് വീഡിയോയ്ക്ക് കമന്റുകളുമായി എത്തിയത്. നേരത്തെയും ഇതുപോലെയുള്ള വീഡിയോ വൈറലായിട്ടുണ്ട്. ഒരു യുവതി ഇന്ഡക്ഷന് സ്റ്റൗവില് ഒരു പ്രഷര് കുക്കര് വച്ചിരിക്കുന്നതും. പ്രഷര് കുക്കര് യുവതി കരുതിയിരുന്ന അത്രയും ചൂടായി എന്ന് തോന്നിയപ്പോള് അതെടുത്ത് ഒരു ഷര്ട്ട് ഇസ്തിരിയിടുന്നതുമായിരുന്നു ആ വീഡിയോയില് ഉണ്ടായിരുന്നത്. ആ വീഡിയോയ്ക്കും ഇതുപോലെ തന്നെ ആള്ക്കാരുടെ രസകരമായ കമന്റുകള് വന്നിരുന്നു. എന്തായാലും, പ്രഷര് കുക്കര് ഒരു അപകടം പിടിച്ച സാധനമാണെന്ന് ഇത്തരം കാര്യങ്ങള് ചെയ്യുമ്പോള് മറന്നുപോകരുതേ.