കഴിഞ്ഞ മാസം ചൈനയിലെ ഗുചെങ്ങിലെ ഹുബെയ് പ്രവിശ്യയിലെ ഒരു പൊലീസ് സ്റ്റേഷനിലേക്ക് പെട്ടി നിറയെ 'കാശു'മായി ഒരു യുവതി കയറിച്ചെന്നു. എന്നാല്‍, ആ പെട്ടിയിലുണ്ടായിരുന്നത് ഒറിജിനല്‍ നോട്ടുകളായിരുന്നില്ല, മറിച്ച് വ്യാജനായിരുന്നു. അത് തന്നെയാണ് യുവതി പെട്ടിയുമായി പൊലീസ് സ്റ്റേഷനില്‍ പോകാന്‍ കാരണവും. യുവതിക്ക് അവളുടെ കാമുകന്‍ നല്‍കിയതാണ് ഈ '80 ലക്ഷം രൂപ'. എന്നാല്‍, പണം ബാങ്കിലിടാന്‍ ചെന്നപ്പോഴാണ് പണി പാളിയത്. ഇത് ശരിക്കും നോട്ടുകളല്ല എന്ന് ബാങ്കിലുള്ളവര്‍ യുവതിയോട് പറയുകയായിരുന്നു. പിന്നാലെ, യുവതി ആ നോട്ടും പെട്ടിയുമായി നേരെ പൊലീസ് സ്റ്റേഷനിലെത്തി. തന്റെ കാമുകനെ ആരോ കള്ളനോട്ടുകള്‍ നല്‍കി പറ്റിച്ചു എന്നായിരുന്നു യുവതി വിശ്വസിച്ചത്. അങ്ങനെ തന്നെയാണ് അവള്‍ പൊലീസിനോട് പറഞ്ഞതും.
പൊലീസ് നോട്ടുകള്‍ പരിശോധിച്ചു. അതിലുണ്ടായിരുന്നത് കള്ളനോട്ടുകള്‍ പോലുമല്ലായിരുന്നു. ബാങ്കുദ്യോഗസ്ഥര്‍ക്ക് പരിശീലനം നല്‍കാന്‍ ഉപയോഗിക്കുന്ന കറന്‍സി പോലെയുള്ള കൂപ്പണുകളായിരുന്നു.
ഒടുവില്‍ യുവതിയുടെ കാമുകനെ പൊലീസ് ചോദ്യം ചെയ്തു. അപ്പോഴാണ് അയാള്‍ ആ സത്യം വെളിപ്പെടുത്തുന്നത്. താന്‍ യുവതിയുമായി പ്രണയത്തിലാണ്. അത് അവളുടെ വീട്ടുകാര്‍ക്കും അറിയാം. അവളുടെ വീട്ടുകാര്‍ നിരന്തരം അയാളെ അവള്‍ക്ക് വേണ്ടി ഒരു ഫ്‌ലാറ്റ് വാങ്ങാന്‍ നിര്‍ബന്ധിക്കുന്നുണ്ട്. എന്നാല്‍, അതിനുള്ള പണം അപ്പോള്‍ അയാളുടെ കയ്യില്‍ ഇല്ലായിരുന്നു. ഒടുവില്‍ നിരന്തരമായ നിര്‍ബന്ധം താങ്ങാനാവാതെ വന്നപ്പോള്‍ അയാള്‍ ഓണ്‍ലൈനില്‍ ഈ പേപ്പര്‍ വാങ്ങി കാമുകിക്ക് സമ്മാനിക്കുകയായിരുന്നു. എന്നാല്‍, ഈ പേപ്പറുകള്‍ കള്ളനോട്ടിന്റെ വിഭാഗത്തില്‍ പെടുന്നതല്ല. അതിനാല്‍ തന്നെ യുവാവിനെതിരെ പൊലീസ് കേസെടുത്തിട്ടില്ല. പകരം അയാളെ കാര്യങ്ങള്‍ പറഞ്ഞ് മനസിലാക്കുകയും മേലാല്‍ ഇത്തരം കാര്യങ്ങള്‍ ചെയ്യരുത് എന്ന് താക്കീത് നല്‍കി പറഞ്ഞു വിടുകയുമായിരുന്നു.
