സ്കൂട്ടറില് ഭാര്യയുമായി പോകവെ ഹൃദയാഘാതം വന്ന് യുവാവ് റോഡിലേക്ക് വീണു. പിന്നാലെ അതുവഴി വന്ന വാഹനങ്ങളോട് നിര്ത്താന് ഭാര്യ ആവശ്യപ്പെട്ടെങ്കിലും ആരും നിര്ത്തിയില്ല. ഒടുവില് യുവാവിനെ ആശുപത്രിയിലെത്തിച്ചെങ്കിലും മരിച്ചതായി ഡോക്ടര്മാര് അറിയിച്ചു. ഹൃദയഭേദകമായ സംഭവത്തിന്റെ സിസിടിവി ദൃശ്യങ്ങള് സമൂഹ മാധ്യമങ്ങളില് വ്യാപകമായി പങ്കുവയ്ക്കപ്പെട്ടതോടെ മനുഷ്യത്വം മരവിച്ചുപോയോയെന്ന ചോദ്യങ്ങളുയര്ന്നു.
ഡിസംബര് 13 -നായിരുന്നു 34 -കാരനായ മെക്കാനിക്ക് വെങ്കിട്ടരമണന് നെഞ്ച് വേദന അനുഭവപ്പെട്ടത്. ഇതേതുടര്ന്ന് ഭാര്യ രൂപയോടൊപ്പം പുലര്ച്ചെ 3.30 ഓടെ ഒരു സ്വകാര്യ ആശുപത്രിയിലേക്ക് പോയി. എന്നാല് ഈ സമയത്ത് അവിടെ ഡോക്ടറില്ലാതിരുന്നതിനാല് അവര് ജയദേവ ഇന്സ്റ്റിറ്റ്യൂട്ട് ഓഫ് കാര്ഡിയോവാസ്കുലര് സയന്സസിലേക്ക് റഫര് ചെയ്തു. തുടര്ന്ന് വെങ്കിട്ടരമണനും ഭാര്യ രൂപയും സ്കൂട്ടറില് ജയദേവ ആശുപത്രിയിലേക്ക് തിരിച്ചെങ്കിലും പാതി വഴിയില് വച്ച് നെഞ്ച് വേദന കൂടുകയും വെങ്കിട്ടരമണ സ്കൂട്ടറില് നിന്നും താഴെ വീഴുകയായിരുന്നു.
റോഡില് വേദന കൊണ്ട് പുളയുന്ന ഭര്ത്താവിന്റെ ജീവന് രക്ഷിക്കാന് രൂപ അതുവഴി പോയ എല്ലാ വാഹന യാത്രക്കാരോടും സഹായം അഭ്യര്ത്ഥിച്ചു. എന്നാല്, രൂപയുടെ കരച്ചിലിന് മുന്നില് ഒരു വാഹനം പോലും നിര്ത്തിയില്ല. വേദന കൊണ്ട് പുളഞ്ഞ് ഭര്ത്താവ് റോഡില് കിടക്കുമ്പോള് അതുവഴി വന്ന ബൈക്കുകളോടും മറ്റ് വാഹനങ്ങളോടും സഹായം അഭ്യര്ത്ഥിച്ച് കൊണ്ട് ഓടുന്ന രൂപയുടെ സിസിടിവി ദൃശ്യങ്ങള് സമൂഹ മാധ്യമങ്ങളില് പങ്കുവയ്ക്കപ്പെട്ടതിന് പിന്നാലെ വൈറലായി. ഒടുവില് അതുവഴി വന്ന ഒരു കാബ് ഡ്രൈവര് കാര് നിര്ത്തുകയും ഇരുവരെയും ആശുപത്രിയില് എത്തിക്കുകയുമായിരുന്നു. എന്നാല്, ഈ സമയത്തിനകം അടിയന്തര ചികിത്സ ലഭിക്കാതെ അദ്ദേഹം മരിച്ചതായി ഡ!!ോക്ടര്മാര് അറിയിച്ചു. വെങ്കിട്ടരമണയുടെ ജീവന് രക്ഷിക്കാന് ആരും തയ്യാറായില്ലെങ്കിലും മരണാനന്തരം അദ്ദേഹത്തിന്റെ കണ്ണുകള് കുടുംബം ദാനം ചെയ്തെന്നും റിപ്പോര്ട്ടുകള് പറയുന്നു.
