ലോകത്തിലെ ഏറ്റവും ശക്തമായ പാസ്പോര്‍ട്ടുകളുടെ പട്ടികയില്‍ യുകെ ഇക്കഴിഞ്ഞ വര്‍ഷം നാലാംസ്ഥാനത്ത്. ബ്രിട്ടന്റെ പൗരന്‍മാര്‍ക്ക് ബെല്‍ജിയം, ലക്സംബര്‍ഗ്, നോര്‍വെ, പോര്‍ച്ചുഗല്‍ എന്നീ രാജ്യങ്ങള്‍ക്കൊപ്പം 191 രാജ്യങ്ങളില്‍ വിസയില്ലാതെ യാത്ര ചെയ്യാം. ഓസ്ട്രേലിയയും ആറാം സ്ഥാനം നിലനിര്‍ത്തി, 189 രാജ്യങ്ങളിലേക്കാണ് ഇവര്‍ക്ക് യാത്ര ചെയ്യാന്‍ കഴിയുക.ഈ വര്‍ഷം നാല് ഇയു അംഗരാജ്യങ്ങളായ ഫ്രാന്‍സ്, ജര്‍മ്മനി, ഇറ്റലി, സ്പെയിന്‍ എന്നിവര്‍ ലോകത്തിലെ അതിശക്തമായ പാസ്പോര്‍ട്ടുകളില്‍ ഇടംപിടിച്ചു. ഇവിടുത്തെ പൗരന്‍മാര്‍ക്ക് ലോകത്തിലെ 227 രാജ്യങ്ങളില്‍ 194 ഇടങ്ങളിലേക്കും വിസയില്ലാതെ സന്ദര്‍ശിക്കാന്‍ കഴിയുമെന്നതാണ് ഗുണം.


188 രാജ്യങ്ങളില്‍ വിസയില്ലാതെ പ്രവേശിക്കാന്‍ യുഎസ് പാസ്പോര്‍ട്ട് അംഗീകാരം നല്‍കുന്നു. 2014-ല്‍ യുകെയും, യുഎസും പട്ടികയില്‍ ഒന്നാം സ്ഥാനത്തായിരുന്നു. ഇന്റര്‍നാഷണല്‍ എയര്‍ ട്രാന്‍സ്പോര്‍ട്ട് അസോസിയേഷന്‍ ഡാറ്റ പ്രകാരം ഹെന്‍ലി പാസ്പോര്‍ട്ട് ഇന്‍ഡക്സാണ് പട്ടിക തയ്യാറാക്കുന്നത്. മുന്‍കൂര്‍ വിസയില്ലാതെ പ്രവേശിക്കാന്‍ കഴിയുന്ന രാജ്യങ്ങളുടെ എണ്ണമാണ് റാങ്കിംഗിലെ പ്രധാന മാനദണ്ഡം.


ഫിന്‍ലാന്‍ഡ്, സൗത്ത് കൊറിയ, സ്വീഡന്‍ എന്നീ രാജ്യങ്ങളുടെ പാസ്പോര്‍ട്ടാണ് ശക്തിയുടെ കാര്യത്തില്‍ രണ്ടാം സ്ഥാനത്തുള്ളത്. ഓസ്ട്രിയ, ഡെന്‍മാര്‍ക്ക്, അയര്‍ലാന്‍ഡ്, നെതര്‍ലാന്‍ഡ്സ് എന്നിവര്‍ മൂന്നാം റാങ്കിലുണ്ട്. ലോകത്തിലെ ഏറ്റവും ദുര്‍ബലമായ പാസ്പോര്‍ട്ടുകളുടെ പട്ടികയില്‍ അഫ്ഗാനിസ്ഥാന്‍, സിറിയ, ഇറാഫ്, പാകിസ്ഥാന്‍, യെമന്‍, സൊമാലിയ എന്നിവരാണ് ഇടംപിടിച്ചത്.