ഡിജിറ്റല് യുഗത്തില് പണം കൈമാറുന്നത് ഏറെ ശ്രദ്ധയോടെ വേണം. ഇല്ലെങ്കില് ചിലപ്പോള് അബദ്ധത്തില് കൂടുതല് തുക അക്കൗണ്ടില് നിന്നും നഷ്ടപ്പെടാനുള്ള സാധ്യത വളരെ ഏറെയാണ്. എന്നാല്, ഇത്തരമൊരു സംഭവത്തില് പതിനയ്യായിരത്തില് അധികം തുക നഷ്ടപ്പെട്ട ഒരാള്ക്ക്, ഓട്ടോ ഡ്രൈവറുടെ സത്യസന്ധത മൂലം പണം തിരിച്ച് കിട്ടി. തികച്ചും ഹൃദയസ്പര്ശിയായ ഒരു സത്യസന്ധതയുടെ കഥ സമൂഹ മാധ്യമങ്ങളില് വൈറലായി. ഓട്ടോ യാത്രയ്ക്ക് ശേഷം യാത്രക്കാരന് അബദ്ധത്തില് തന്റെ അക്കൗണ്ടിലേക്ക് അയച്ച 15,682 രൂപ ഒട്ടും മടി കൂടാതെ പൂര്ണ്ണമായും തിരികെ നല്കി മാതൃകയായിരിക്കുകയാണ് ഒരു ഓട്ടോ ഡ്രൈവര്. ലിങ്ക്ഡ്ഇന് വഴി പങ്കുവെക്കപ്പെട്ട ഒരു കുറിപ്പിലൂടെയാണ് ഈ സംഭവം പുറംലോകമറിഞ്ഞത്.
യാത്ര കഴിഞ്ഞ് ഓണ്ലൈനായി പണം കൈമാറുന്നതിനിടെയാണ് യാത്രക്കാരന് അബദ്ധം പിണഞ്ഞത്. യഥാര്ത്ഥ തുകയ്ക്ക് പകരം 15,682 രൂപ അദ്ദേഹം ഡ്രൈവറുടെ അക്കൗണ്ടിലേക്ക് അയക്കുകയായിരുന്നു. പണം ട്രാന്സ്ഫര് ആയിക്കഴിഞ്ഞ ശേഷമാണ് തനിക്ക് പറ്റിയ വലിയ അബദ്ധം അദ്ദേഹം തിരിച്ചറിഞ്ഞത്. ഇത്രയും വലിയ തുകയായതിനാല് ഇനി ഇത് തിരികെ ലഭിക്കാന് ബുദ്ധിമുട്ടായിരിക്കുമെന്ന ആശങ്കയോടെയാണ് യാത്രക്കാരന് ഡ്രൈവറെ ബന്ധപ്പെട്ടത്. എന്നാല്, അദ്ദേഹത്തെ അദ്ഭുതപ്പെടുത്തിക്കൊണ്ട്, തന്റെ അക്കൗണ്ടില് പണം വന്നിട്ടുണ്ടെന്ന് ഡ്രൈവര് സമ്മതിക്കുകയും, യാതൊരു മടിയും കൂടാതെ മുഴുവന് തുകയും ഉടനടി കൈമാറുകയും ചെയ്തു. 'നിയമപരമായ ബാധ്യതകളോ സമ്മര്ദ്ദങ്ങളോ ഇല്ലാതിരുന്നിട്ടും, സ്വന്തം മനസ്സാക്ഷിയുടെ വിളി മാത്രം കേട്ടാണ് ആ ഡ്രൈവര് പണം തിരികെ നല്കിയത്.' യാത്രക്കാരന് തന്റെ ലിങ്ക്ഡ്ഇന് പോസ്റ്റില് കുറിച്ചു.
ഓട്ടോ ഡ്രൈവറുടെ ഈ അസാധാരണ സത്യസന്ധതയെ പ്രശംസിച്ച് കൊണ്ട് യാത്രക്കാരന് പങ്കുവെച്ച പോസ്റ്റ് നിമിഷനേരം കൊണ്ടാണ് വൈറലായത്. ദൈനംദിന ജീവിതത്തില് അപൂര്വ്വമായി മാത്രം കാണാന് കഴിയുന്ന നേര്ക്കാഴ്ചയാണിതെന്നാണ് സമൂഹ മാധ്യമ ഉപയോക്താക്കള് ഒന്നടങ്കം അഭിപ്രായപ്പെട്ടു. ആയിരക്കണക്കിന് ആളുകളാണ് ഈ വാര്ത്തയോട് പ്രതികരിച്ചത്. ഡ്രൈവറുടെ ഈ വലിയ മനസ്സ് മനുഷ്യത്വത്തിലുള്ള തങ്ങളുടെ വിശ്വാസം വീണ്ടെടുക്കാന് സഹായിച്ചുവെന്ന് പലരും കുറിച്ചു. വിവാദങ്ങളും നെഗറ്റീവ് വാര്ത്തകളും മാത്രം അതിവേഗം പടരുന്ന ഇന്നത്തെ കാലത്ത്, നന്മയും സത്യസന്ധതയും ഇപ്പോഴും ജനഹൃദയങ്ങളെ സ്വാധീനിക്കുന്നു എന്നതിന്റെ തെളിവായി മാറുകയാണ് ഈ സംഭവം.
