വലിയ പ്രതീക്ഷകളോടെ ഉപജീവനത്തിനായി വാങ്ങിയ വാഹനം നിരന്തരം തകരാറിലായതിലും, അത് നന്നാക്കി നല്കാന് കമ്പനി വിസമ്മതിച്ചതിലും പ്രതിഷേധിച്ച് യുവതി സ്വന്തം ഇ-റിക്ഷയ്ക്ക് തീയിട്ടു. മധ്യപ്രദേശിലെ ശിവ്പുരിയിലാണ് ഈ സംഭവം നടന്നത്. ഫക്കര് കോളനി നിവാസിയായ ഗുഡിയ മഹാര് എന്ന യുവതിയാണ് തന്റെ ഏക വരുമാന മാര്?ഗമായിരുന്ന വാഹനം പെട്രോളൊഴിച്ച് കത്തിച്ചത്. ദിവസക്കൂലിക്കാരായ ഗുഡിയയും ഭര്ത്താവ് നാരായണ് മഹാറും തങ്ങളുടെ മൂന്ന് കുട്ടികളെ വളര്ത്താന് സ്ഥിരമായ ഒരു വരുമാനം കണ്ടെത്തുക എന്ന ലക്ഷ്യത്തോടെയാണ് ഈ ഇ-റിക്ഷ വാങ്ങിയത്. ഏകദേശം 2.30 ലക്ഷം മുതല് 2.50 ലക്ഷം രൂപ വരെ വിലവരുന്ന വാഹനം ഫിനാന്സ് വഴിയാണ് ഇവര് സ്വന്തമാക്കിയത്. കൂലിപ്പണിയില് നിന്നുള്ള അനിശ്ചിതമായ വരുമാനത്തിന് പകരമായി ഈ വാഹനം കുടുംബത്തിന് വലിയൊരു പ്രതീക്ഷയായിരുന്നു.
വാഹനം വാങ്ങി രണ്ട് മാസം തികയും മുമ്പേ അത് പണിമുടക്കി. കഴിഞ്ഞ നാല് മാസമായി വാഹനം നന്നാക്കി നല്കണമെന്ന് ആവശ്യപ്പെട്ട് ഗുഡിയ ഏജന്സിയില് കയറിയിറങ്ങിയെങ്കിലും അധികൃതര് ഓരോ തവണയും അവരെ തിരിച്ചയക്കുകയായിരുന്നു. വാഹനം ഓടിക്കാന് കഴിയാതെ വീട്ടില് ഇരിക്കുമ്പോഴും ലോണ് തിരിച്ചടയ്ക്കേണ്ടി വന്നത് കുടുംബത്തെ വലിയ സാമ്പത്തിക പ്രതിസന്ധിയിലാക്കി. സഹികെട്ട ഗുഡിയ താന് വാഹനം വാങ്ങിയ അതേ ഏജന്സിക്ക് മുന്നിലെ തിരക്കേറിയ ചന്തയില് വെച്ച് ഇ-റിക്ഷയ്ക്ക് തീയിടുകയായിരുന്നു. ഇതിന്റെ വീഡിയോ ഇപ്പോള് സോഷ്യല് മീഡിയയില് വ്യാപകമായി പ്രചരിക്കുകയാണ്. ദാരിദ്ര്യത്തില് നിന്നും കരകയറാന് ശ്രമിച്ച ഒരു സാധാരണ കുടുംബത്തിന്റെ ഏക സ്വത്താണ് ഒരു നിമിഷത്തെ പ്രതിഷേധത്തില് ചാരമായത്.
