ലണ്ടന്: മികച്ച ഭാവിയും ഉയര്ന്ന വരുമാനവും പ്രതീക്ഷിച്ച് യുകെ സര്വകലാശാലകളിലേക്ക് പഠനത്തിനായി പോകുന്ന വിദ്യാര്ത്ഥികള് കൂടുതല് ജാഗ്രത പാലിക്കണമെന്ന് മുന്നറിയിപ്പ്. ഉയര്ന്ന ട്യൂഷന് ഫീസ്, വിദ്യാഭ്യാസ ലോണ്, ജീവിതച്ചെലവ്, ജോലി ലഭ്യതയിലെ അനിശ്ചിതത്വം എന്നിവയ്ക്കിടയില്, എല്ലാ യുകെ ഡിഗ്രികളും പ്രതീക്ഷിക്കുന്ന സാമ്പത്തിക നേട്ടം നല്കുന്നില്ലെന്ന ആശങ്ക ശക്തമാകുകയാണ്. ബ്രിട്ടീഷ് തിങ്ക് ടാങ്കായ പോളിസി എക്സ്ചേഞ്ചിന്റെ പുതിയ പഠനപ്രകാരം, യുകെയില് പഠനം പൂര്ത്തിയാക്കിയവരില് വലിയൊരു വിഭാഗം ദേശീയ ശരാശരി വരുമാനത്തിന് താഴെയാണ് സമ്പാദിക്കുന്നത്. യുകെയിലെ ഫുള്ടൈം ജോലിക്കാരുടെ ശരാശരി വാര്ഷിക വരുമാനമായ ഏകദേശം 35,000 പൗണ്ട് എന്ന നിലയില് എത്താന്, വര്ഷം തോറും 1.5 ലക്ഷത്തിലേറെ ഗ്രാജുവേറ്റുകള്ക്ക് കഴിയുന്നില്ലെന്നാണ് റിപ്പോര്ട്ട് ചൂണ്ടിക്കാട്ടുന്നത്.
റിപ്പോര്ട്ടില് പറയുന്നതനുസരിച്ച്, പഠനം പൂര്ത്തിയാക്കി അഞ്ച് വര്ഷങ്ങള് കഴിഞ്ഞിട്ടും 11 ശതമാനത്തിലേറെ ഗ്രാജുവേറ്റുകള് ദേശീയ ലിവിങ് വേജിനേക്കാള് താഴെയുള്ള വരുമാനത്തിലാണ്. കൂടാതെ, പഠനം പൂര്ത്തിയാക്കി 15 മാസത്തിന് ശേഷം 57 ശതമാനം പേര്ക്ക് മാത്രമാണ് ഫുള്ടൈം ജോലി ലഭിക്കുന്നത്. ഇതോടെ, സര്വകലാശാലാ പഠനം മാത്രം ഉയര്ന്ന വരുമാനത്തിനും സ്ഥിരമായ തൊഴില്സുരക്ഷയ്ക്കും ഉറപ്പ് നല്കില്ലെന്ന ചര്ച്ച വീണ്ടും ശക്തമായിരിക്കുകയാണ്. വര്ഷത്തില് വലിയ ചെലവ് വരുന്ന കോഴ്സുകളും പഠന വായ്പകളും ഏറ്റെടുക്കുന്നതിന് മുമ്പ്, കോഴ്സിന്റെ തൊഴില് സാധ്യത, മുന് വിദ്യാര്ത്ഥികളുടെ വരുമാനനില, വ്യവസായ ബന്ധം, ഇന്റേണ്ഷിപ്പ് അവസരങ്ങള്, പോസ്റ്റ്-സ്റ്റഡി വര്ക്ക് സാധ്യതകള് എന്നിവ വിശദമായി പരിശോധിക്കണമെന്ന് വിദഗ്ധര് നിര്ദേശിക്കുന്നു. പ്രത്യേകിച്ച് അന്താരാഷ്ട്ര വിദ്യാര്ത്ഥികള്ക്ക് ട്യൂഷന് ഫീസിനൊപ്പം താമസം, ഭക്ഷണം, വിസ, ഹെല്ത്ത് സര്ചാര്ജ് തുടങ്ങിയ ചെലവുകളും വലിയ സാമ്പത്തിക സമ്മര്ദ്ദമാകാം.
മെഡിസിന്, ഡെന്റിസ്ട്രി, ഇക്കണോമിക്സ്, ഫിസിക്സ് ആന്ഡ് ആസ്ട്രോണമി, മാത്തമാറ്റിക്കല് സയന്സ്, എന്ജിനീയറിംഗ് തുടങ്ങിയ വിഷയങ്ങളില് പഠിക്കുന്നവര്ക്ക് ശരാശരിയില് ഉയര്ന്ന വരുമാന സാധ്യതയുണ്ടെന്നാണ് റിപ്പോര്ട്ട് സൂചിപ്പിക്കുന്നത്. അതേസമയം, ചില മറ്റു വിഷയങ്ങളില് പഠനം പൂര്ത്തിയാക്കിയവര്ക്കിടയില് കുറഞ്ഞ വരുമാനവും ഗ്രാജുവേറ്റ് തലത്തിലുള്ള ജോലികള് ലഭിക്കാത്തതുമുള്ള പ്രവണതയും റിപ്പോര്ട്ട് ചൂണ്ടിക്കാട്ടുന്നു. എന്നാല്, സര്വകലാശാലാ പഠനം പൂര്ണമായും വിലകുറഞ്ഞതായി കാണാനാകില്ലെന്ന നിലപാടും വിദ്യാഭ്യാസ മേഖലയില് നിന്ന് ഉയരുന്നുണ്ട്. ദീര്ഘകാലത്ത് ഗ്രാജുവേറ്റുകള്ക്ക് നോണ്-ഗ്രാജുവേറ്റുകളെ അപേക്ഷിച്ച് മികച്ച തൊഴില് സാധ്യതയും വരുമാന വളര്ച്ചയും ലഭിക്കുന്നുവെന്ന് സര്വകലാശാലാ മേഖല ചൂണ്ടിക്കാട്ടുന്നു. അതിനാല് പ്രശ്നം ഡിഗ്രിയിലല്ല, ശരിയായ കോഴ്സും തൊഴില്മാര്ഗവും തിരഞ്ഞെടുക്കുന്നതിലാണ് എന്നതാണ് പ്രധാന സന്ദേശം. യുകെയിലേക്ക് പഠനത്തിനായി പോകാന് ആലോചിക്കുന്ന വിദ്യാര്ത്ഥികള് പരസ്യങ്ങളിലോ ഏജന്സികളുടെ വാഗ്ദാനങ്ങളിലോ മാത്രം ആശ്രയിക്കാതെ, ഓരോ കോഴ്സിന്റെയും യഥാര്ത്ഥ തൊഴില്ഫലം, ചെലവ്-വരുമാന അനുപാതം, വിസാനന്തര തൊഴില് സാധ്യത എന്നിവ സ്വതന്ത്രമായി പരിശോധിച്ചശേഷം മാത്രം തീരുമാനം എടുക്കണമെന്നാണ് പുതിയ റിപ്പോര്ട്ട് നല്കുന്ന മുന്നറിയിപ്പ്.
