ബാംഗോര്: നോര്ത്ത് വെയില്സിലെ ബാംഗോറില് മെനൈ കടലിടുക്കിന്റെ തീരത്ത് നവജാത ശിശുവിന്റെ മൃതദേഹം കണ്ടെത്തിയ സംഭവത്തില് അന്വേഷണം ശക്തമാക്കി പൊലീസ്. ഞായറാഴ്ച വൈകിട്ട് അഞ്ചുമണിയോടെ സിലിവെന് റോഡിന് സമീപത്തെ തീരത്താണ് മൃതദേഹം കണ്ടെത്തിയത്. കുഞ്ഞിന്റെ അമ്മയെ കണ്ടെത്താനും അവരുടെ ആരോഗ്യവും സുരക്ഷയും ഉറപ്പാക്കാനുമാണ് അധികൃതര് അടിയന്തര പ്രാധാന്യം നല്കുന്നത്. കുഞ്ഞിന്റെ മരണവുമായി ബന്ധപ്പെട്ട സാഹചര്യങ്ങള് ഇതുവരെ വ്യക്തമായിട്ടില്ല. അമ്മ ഭയന്നിരിക്കുകയോ എന്തുചെയ്യണമെന്നറിയാതെ വിഷമിക്കുകയോ ചെയ്യാമെന്ന് ബെറ്റ്സി കാഡ്വാലഡര് സര്വകലാശാല ആരോഗ്യ ബോര്ഡിലെ മിഡ്വൈഫറി ആന്ഡ് വിമണ്സ് സര്വീസസ് ഡയറക്ടര് ഫിയോണ ജിറോഡ് പറഞ്ഞു. ഈ സാഹചര്യത്തില് ഒറ്റപ്പെടാതെ സഹായം തേടണമെന്നും അവര് അഭ്യര്ഥിച്ചു.
ആരോഗ്യപ്രവര്ത്തകരെയോ പൊലീസ് ഉദ്യോഗസ്ഥരെയോ സമീപിച്ചോ പൊലീസ് സ്റ്റേഷനില് നേരിട്ടെത്തിയോ സഹായം തേടാം. അഭ്യര്ഥന കാണുകയോ കേള്ക്കുകയോ ചെയ്യുന്നുണ്ടെങ്കില് മുന്നോട്ടുവന്ന് ബന്ധപ്പെടണമെന്നും സഹായിക്കാന് ആളുകളുണ്ടെന്നും ഫിയോണ ജിറോഡ് വ്യക്തമാക്കി. കുഞ്ഞിന്റെ പിതാവ്, അമ്മയുടെ കുടുംബാംഗങ്ങള്, സുഹൃത്തുക്കള്, അയല്വാസികള്, സഹപ്രവര്ത്തകര് എന്നിവരോടും വിവരങ്ങള് കൈമാറാന് പൊലീസ് ആവശ്യപ്പെട്ടു. കഴിഞ്ഞ ഏതാനും മാസങ്ങളില് ഗര്ഭിണിയായിരുന്നിരിക്കാമെന്ന് കരുതുന്ന സ്ത്രീയെയോ പെണ്കുട്ടിയെയോ കുറിച്ച് പ്രസക്തമായ വിവരങ്ങളുള്ളവര് അറിയിക്കണം. കുടുംബാംഗങ്ങളില്നിന്നും സുഹൃത്തുക്കളില്നിന്നും അകന്നുനില്ക്കുക, സാമൂഹിക ബന്ധങ്ങള് ഒഴിവാക്കുക തുടങ്ങിയ സമീപകാല പെരുമാറ്റമാറ്റങ്ങള് ശ്രദ്ധിച്ചവരും വിവരം നല്കണമെന്ന് പൊലീസ് അഭ്യര്ഥിച്ചു.
കുഞ്ഞിന്റെ പോസ്റ്റ്മോര്ട്ടം പരിശോധന നാളെ ഉച്ചയ്ക്ക് നടത്തുമെന്നാണ് അറിയിച്ചിരിക്കുന്നത്. അന്വേഷണത്തിന്റെ ഭാഗമായി അടുത്ത ദിവസങ്ങളില് ബാംഗോര് പ്രദേശത്ത് കൂടുതല് പൊലീസ് സാന്നിധ്യമുണ്ടാകുമെന്നും അധികൃതര് വ്യക്തമാക്കി. സംഭവത്തെക്കുറിച്ച് വിവരമുള്ളവര് 101 എന്ന പൊലീസ് നമ്പറില് വിളിച്ച് 'ഓപ്പറേഷന് മെലെക്സ്' എന്ന് പരാമര്ശിക്കണം. പൊലീസിന്റെ പ്രത്യേക വിവരശേഖരണ സംവിധാനത്തിലൂടെയും വിവരങ്ങള് കൈമാറാം. മരണത്തിലേക്ക് നയിച്ച സാഹചര്യങ്ങളെക്കുറിച്ചുള്ള കൂടുതല് വിവരങ്ങള് പൊലീസ് പുറത്തുവിട്ടിട്ടില്ല.
