ലണ്ടന്: ബ്രിട്ടന്റെ രാഷ്ട്രീയ സംവിധാനത്തില് സമഗ്ര മാറ്റങ്ങള് കൊണ്ടുവരുമെന്ന് പ്രഖ്യാപിച്ച് പ്രധാനമന്ത്രി ആന്ഡി ബേണ്ഹാം. പെന്ഷന് ട്രിപ്പിള് ലോക്ക് സംവിധാനം അവസാനിപ്പിക്കുക, ബ്രെക്സിറ്റ് പുനഃപരിശോധിക്കുക, തിരഞ്ഞെടുപ്പ് സമ്പ്രദായം പരിഷ്കരിക്കുക തുടങ്ങിയ നിര്ദേശങ്ങളാണ് ലേബര് പാര്ട്ടിയുടെ വാര്ഷിക സമ്മേളനത്തിലെ ആദ്യ പ്രസംഗത്തില് അദ്ദേഹം അവതരിപ്പിച്ചത്. ബ്രിട്ടീഷ് രാഷ്ട്രീയത്തെ പുതിയ ദിശയിലേക്ക് നയിക്കുകയാണ് ലക്ഷ്യമെന്നും ബേണ്ഹാം പറഞ്ഞു.
സംസ്ഥാന പെന്ഷന്റെ മൂല്യം സംരക്ഷിക്കുന്ന ട്രിപ്പിള് ലോക്ക് സംവിധാനം ഒഴിവാക്കുന്നതിലൂടെ ലഭിക്കുന്ന തുക ദേശീയ കെയര് സര്വീസ് ആരംഭിക്കാന് വിനിയോഗിക്കാനാണ് പദ്ധതി. അല്ഷിമേഴ്സ് ബാധിച്ച് ഈ മാസം അന്തരിച്ച പിതാവ് റോയിയുടെ ഓര്മകള് പങ്കുവച്ചുകൊണ്ടായിരുന്നു പ്രഖ്യാപനം. പിതാവിന്റെ അവസാന നാളുകള് കെയര് ഹോമിലായിരുന്നുവെന്നും ബേണ്ഹാം പറഞ്ഞു.
അതേസമയം, ട്രിപ്പിള് ലോക്ക് അവസാനിപ്പിക്കുന്നതിലൂടെ അടുത്ത ദശകത്തിന്റെ അവസാനത്തോടെ പെന്ഷന്കാര്ക്ക് ആകെ പ്രതിവര്ഷം 15 ബില്യണ് പൗണ്ടിന്റെ നഷ്ടമുണ്ടാകുമെന്നാണ് റിപ്പോര്ട്ട്. ദേശീയ കെയര് സര്വീസിന് ആവശ്യമായ പണം കണ്ടെത്താന് നികുതി വര്ധനയും വേണ്ടിവന്നേക്കുമെന്ന് സര്ക്കാര് വൃത്തങ്ങള് സൂചിപ്പിച്ചു.
നിര്ദിഷ്ട പദ്ധതിയില് വ്യക്തിഗത പരിചരണച്ചെലവുകള് മാത്രമായിരിക്കും ഉള്പ്പെടുകയെന്നും താമസച്ചെലവുകള് പരിധിക്ക് പുറത്തായിരിക്കുമെന്നും റിപ്പോര്ട്ടുകളുണ്ട്. ഇതോടെ വയോജന പരിചരണച്ചെലവുകള്ക്കായി ചിലര്ക്ക് വീടുകള് വില്ക്കേണ്ടിവരുന്ന സാഹചര്യം തുടര്ന്നേക്കാമെന്നും വിലയിരുത്തപ്പെടുന്നു.
ബ്രെക്സിറ്റ് ബ്രിട്ടന് ഗുണത്തേക്കാളേറെ ദോഷമാണ് ചെയ്തതെന്ന നിലപാടും ബേണ്ഹാം വ്യക്തമാക്കി. യൂറോപ്യന് യൂണിയനുമായുള്ള ഭാവിബന്ധം സംബന്ധിച്ച നിര്ദേശങ്ങള് ഈ ശരത്കാലത്ത് നടക്കാനിരിക്കുന്ന ചര്ച്ചകള്ക്കു മുന്പ് പ്രസിദ്ധീകരിക്കും. യൂറോപ്യന് ഏകീകൃത വിപണിയിലും കസ്റ്റംസ് യൂണിയനിലും വീണ്ടും പങ്കാളിയാകുന്നതുമുതല് യൂറോപ്യന് യൂണിയനില് പൂര്ണമായി തിരിച്ചുചേരുന്നതുവരെയുള്ള സാധ്യതകള് ഇതില് ഉള്പ്പെട്ടേക്കും.
തിരഞ്ഞെടുപ്പ് സമ്പ്രദായം പരിഷ്കരിക്കുന്നതിനായി ദേശീയ തിരഞ്ഞെടുപ്പ് പരിഷ്കരണ കമ്മീഷന് രൂപീകരിക്കുമെന്നും ബേണ്ഹാം പ്രഖ്യാപിച്ചു. നിലവിലെ 'ഫസ്റ്റ് പാസ്റ്റ് ദ പോസ്റ്റ്' രീതിക്കു പകരമുള്ള സംവിധാനം സംബന്ധിച്ച് കമ്മീഷന് നിര്ദേശങ്ങള് സമര്പ്പിക്കും. ഇവ അടുത്ത തിരഞ്ഞെടുപ്പിനുള്ള ലേബര് പാര്ട്ടിയുടെ പ്രകടനപത്രികയില് ഉള്പ്പെടുത്താനാണ് തീരുമാനം. നൂറിലേറെ വര്ഷത്തിനിടയിലെ ഏറ്റവും വലിയ തിരഞ്ഞെടുപ്പ് പരിഷ്കരണത്തിലേക്ക് വഴിതുറക്കുന്ന നീക്കമായാണ് ഇതിനെ വിലയിരുത്തുന്നത്.
