ലണ്ടന്‍: ബ്രിട്ടന്റെ ഭാവി യൂറോപ്യന്‍ യൂണിയനുള്ളിലാണെന്ന് മുന്‍ ധനമന്ത്രി റേച്ചല്‍ റീവ്സ്. ബ്രെക്സിറ്റ് രാജ്യത്തെ കൂടുതല്‍ ദരിദ്രവും ദുര്‍ബലവും സുരക്ഷിതത്വം കുറഞ്ഞതുമാക്കിയെന്ന് അവര്‍ വിമര്‍ശിച്ചു. ട്രഷറിയുടെ ചുമതല ഒഴിഞ്ഞശേഷമുള്ള ആദ്യ പ്രധാന രാഷ്ട്രീയ ഇടപെടലിലാണ് റീവ്സ് നിലപാട് വ്യക്തമാക്കിയത്. ഒരു ലേഖനത്തിലാണ് യൂറോപ്യന്‍ യൂണിയനിലേക്കുള്ള തിരിച്ചുപോക്കിനെ അനുകൂലിച്ച് റീവ്സ് രംഗത്തെത്തിയത്. യൂറോപ്യന്‍ രാജ്യങ്ങളുമായുള്ള ബ്രിട്ടന്റെ ഭാവിബന്ധത്തെക്കുറിച്ച് തുറന്ന ചര്‍ച്ചകള്‍ നടക്കുന്നതിനെ സ്വാഗതം ചെയ്യുന്നതായും അവര്‍ പറഞ്ഞു.
യൂറോപ്യന്‍ ബന്ധത്തെക്കുറിച്ച് സത്യസന്ധമായ ചര്‍ച്ച ആവശ്യമാണെന്ന് പ്രധാനമന്ത്രി ആന്‍ഡി ബേണ്‍ഹാമും നേരത്തെ വ്യക്തമാക്കിയിരുന്നു. എന്നാല്‍ ബന്ധത്തില്‍ മാറ്റങ്ങള്‍ വരുത്തുന്നതിന് അടുത്ത പൊതുതെരഞ്ഞെടുപ്പില്‍ ജനവിധി തേടേണ്ടിവരുമെന്നാണ് അദ്ദേഹത്തിന്റെ നിലപാട്. യൂറോപ്യന്‍ യൂണിയനില്‍ വീണ്ടും ചേരുന്നതും സ്വതന്ത്ര സഞ്ചാരാവകാശം, ഏകവിപണി അംഗത്വം, കസ്റ്റംസ് യൂണിയന് എന്നിവ പുനഃസ്ഥാപിക്കുന്നതും 2024ലെ ലേബര്‍ പ്രകടനപത്രിക ഒഴിവാക്കിയിരുന്നു. യൂണിയന് പുറത്തുതന്നെ തുടര്‍ന്ന് ബ്രെക്സിറ്റ് വിജയകരമാക്കുമെന്നായിരുന്നു പാര്‍ട്ടിയുടെ വാഗ്ദാനം. അതേസമയം, ബ്രെക്സിറ്റ് ചര്‍ച്ചകള്‍ വീണ്ടും തുറക്കാന്‍ താല്‍പര്യമില്ലെന്ന് കണ്‍സര്‍വേറ്റീവ് പാര്‍ട്ടി വ്യക്തമാക്കി. യൂറോപ്യന്‍ യൂണിയനുമായി കൂടുതല്‍ അടുക്കാനുള്ള നടപടികള്‍ക്ക് ജനവിധിയില്ലെന്നാണ് റിഫോം യുകെ നേതാവ് നിഗല്‍ ഫറാജിന്റെ പ്രതികരണം.
