പത്തനംതിട്ട: ശബരിമല സ്വര്ണ്ണക്കൊള്ള കേസില് തന്ത്രി കണ്ഠരര് രാജീവര്ക്കെതിരെ മുന് ദേവസ്വം ബോര്ഡ് പ്രസിഡന്റ് എ. പത്മകുമാര് മൊഴി നല്കി.
- ഉണ്ണികൃഷ്ണന് പോറ്റി ശബരിമലയില് എത്തിയത് തന്ത്രി രാജീവരുടെ അറിവോടെയാണെന്നും, പോറ്റിയുമായി രാജീവര്ക്കു അടുത്ത ബന്ധമുണ്ടെന്നും പത്മകുമാര് മൊഴിയില് പറഞ്ഞു.
- പോറ്റിയെ തനിക്ക് പരിചയപ്പെടുത്തിയത് തന്ത്രിയാണെന്നും, അതുകൊണ്ടാണ് വിശ്വാസം കാട്ടിയതെന്നും അദ്ദേഹം വ്യക്തമാക്കി.
- പോറ്റി ശബരിമലയില് ശക്തനായത് തന്ത്രിയുടെയും ഉദ്യോഗസ്ഥരുടെയും പിന്തുണയിലൂടെയാണെന്നും, മുന് ദേവസ്വം മന്ത്രി കടകംപള്ളി സുരേന്ദ്രനുമായി നേരത്തെ പരിചയമുണ്ടെന്ന് പോറ്റി തന്നോട് പറഞ്ഞിട്ടുണ്ടെന്നും മൊഴിയില് പറയുന്നു.
- കസ്റ്റഡിയിലുള്ള പത്മകുമാറിനെ ഇന്ന് കൊല്ലം കോടതിയില് ഹാജരാക്കും.
സ്വര്ണ്ണപൂശല് അനുമതി
- കട്ടിളപ്പാളികളും ദ്വാരപാലക ശില്പ്പങ്ങളും സ്വര്ണ്ണം പൂശാനായി സന്നിധാനത്തില് നിന്ന് ചെന്നൈയിലേക്ക് കൊണ്ടുപോകാന് തന്ത്രിമാര് അനുമതി നല്കിയിരുന്നുവെന്ന് പത്മകുമാര് മൊഴി നല്കി.
- സന്നിധാനത്ത് ഗോള്ഡ് പ്ലേറ്റിംഗ് നടത്താന് കഴിയാത്തതിനാല് മാനുവലിന് വിരുദ്ധമായി പുറത്തേക്ക് കൊണ്ടുപോകാന് അനുമതി നല്കിയതാണെന്നും, ഉദ്യോഗസ്ഥരോട് കൃത്യമായ തൂക്കവും അളവും രേഖപ്പെടുത്തി മാത്രമേ കൊണ്ടുപോകാന് പാടുള്ളൂ എന്ന് നിര്ദ്ദേശിച്ചിരുന്നുവെന്നും അദ്ദേഹം പറഞ്ഞു.
- മുന് ഭരണസമിതിയുടെ കാലത്തും ക്ലാഡിങ് വര്ക്ക് പുറത്തെടുത്ത് നടത്തിയിട്ടുണ്ടെന്നും പത്മകുമാര് വിശദീകരിച്ചു.
സാമ്പത്തിക ഇടപാട് ആരോപണം
- ഉണ്ണികൃഷ്ണന് പോറ്റിയുമായി സാമ്പത്തിക ഇടപാട് നടത്തിയെന്ന ആരോപണം പത്മകുമാര് നിഷേധിച്ചു.
- എന്നാല്, ശബരിമലയിലെ തന്റെ മുറിയില് പോറ്റി താമസിച്ചതും ആറന്മുളയിലെ വീട്ടില് സന്ദര്ശിച്ചതും അദ്ദേഹം സമ്മതിച്ചു.
- സൗഹൃദ സന്ദര്ശനമായിരുന്നു ഇവയെന്ന് പത്മകുമാര് അന്വേഷണ സംഘത്തോട് വ്യക്തമാക്കി.
