തന്റെ പദ്ധതികളെ ഒരിക്കലും തള്ളിക്കളയാതെ, എപ്പോഴും ന്യായീകരിക്കുന്ന ചാന്സലറെന്ന പേരിലാണ് റേച്ചല് റീവ്സ് അറിയപ്പെടുന്നത്. എന്നാല് യുവാക്കളുടെ തൊഴിലില്ലായ്മ കുതിച്ചുയര്ന്നതിന് പിന്നില് തന്റെ ആദ്യ ബജറ്റിലെ തീരുമാനങ്ങളാണെന്ന് ഇപ്പോള് റീവ്സ് സമ്മതിക്കുന്നു.
നാഷണല് ഇന്ഷുറന്സ് വര്ദ്ധിപ്പിക്കരുതെന്ന വാദങ്ങള് ശരിയാണെന്ന് റീവ്സ് അംഗീകരിച്ചു. പൊതുസേവനങ്ങള്ക്ക് പണം ആവശ്യമായതിനാലാണ് എന്.ഐ. വര്ദ്ധിപ്പിച്ചതെന്ന് ട്രഷറി സെലക്ട് കമ്മിറ്റിക്ക് മുന്നില് അവര് വിശദീകരിച്ചു. എന്നാല് ഈ നീക്കം ബിസിനസ്സുകള്ക്ക് പുതിയ ജോലിക്കാരെ എടുക്കാന് മടിയുണ്ടാക്കി, പ്രത്യേകിച്ച് യുവാക്കള്ക്ക് വലിയ ആഘാതമായി.
യുവാക്കള്ക്ക് ആവശ്യമായ വിദ്യാഭ്യാസവും തൊഴില് പരിശീലനവും ഇല്ലാത്തതും തൊഴിലില്ലായ്മയ്ക്ക് കാരണമാണെന്ന് റീവ്സ് പറഞ്ഞു. ഇത് പരിഹരിക്കാന് സര്ക്കാര് നടപടികള് സ്വീകരിച്ചിട്ടുണ്ടെന്നും അവകാശപ്പെട്ടു.
ഇതിനിടെ, ജി7 രാജ്യങ്ങളില് യുകെയില് മാത്രമാണ് പണപ്പെരുപ്പം 3 ശതമാനത്തിന് മുകളിലേക്ക് പോകുമെന്ന് ഒഇസിഡി റിപ്പോര്ട്ട് മുന്നറിയിപ്പ് നല്കിയത്. ബ്രിട്ടനിലെ ജനങ്ങള്ക്ക് ഏറ്റവും വലിയ ജീവിതച്ചെലവ് സമ്മര്ദം നേരിടേണ്ടിവരുമെന്നതാണ് റിപ്പോര്ട്ടിന്റെ സൂചന.
മിഡില് ഈസ്റ്റിലെ യുദ്ധം രണ്ടാഴ്ച നീളുന്നതോടെ ബ്രിട്ടന്റെ പണപ്പെരുപ്പ പ്രശ്നങ്ങള് കൂടുതല് രൂക്ഷമാകുമെന്ന് ഉറപ്പായി. ഏപ്രിലില് ലക്ഷ്യമിട്ട 2 ശതമാനത്തിലേക്ക് പണപ്പെരുപ്പം എത്തുമെന്ന പ്രതീക്ഷയ്ക്കിടയില് വന്ന തിരിച്ചടിയാണ് ഇത്
