ലണ്ടന്: മികച്ച വരുമാനവും ജീവിതവും ലക്ഷ്യമിട്ട് വിദേശരാജ്യങ്ങളിലേക്ക് ചേക്കേറുന്നവരുടെ എണ്ണം ദിനംപ്രതി വര്ധിച്ചുവരുമ്പോള്, ഭാഷയും സംസ്കാരവും മനസ്സിലാക്കാതെ പോകുന്നത് വലിയ പ്രതിസന്ധിയിലേക്ക് നയിക്കാമെന്നതിന് ഉദാഹരണമാണ് ഇംഗ്ലണ്ടില് നിന്നുള്ള ഒരു വാര്ത്ത. 2023-ല് ശ്രീപെരമ്പുദുരു സ്വദേശിയായ സായി കീര്ത്തന എന്ന തെലുങ്ക് യുവതി യോര്ക്ക് നഗരത്തിലെ സ്വകാര്യ ആശുപത്രിയില് ലാംഗ്വേജ് ആന്ഡ് സ്പീച്ച് തെറാപ്പിസ്റ്റായി ജോലി നേടി. രേഖകളില് തന്റെ മാതൃഭാഷ ഇംഗ്ലീഷാണെന്ന് രേഖപ്പെടുത്തി ജോലിയില് പ്രവേശിച്ചെങ്കിലും, ജോലിക്ക് ചേര്ന്നതോടെ ഇംഗ്ലണ്ടിലെ ഇംഗ്ലീഷ് സംസാരശൈലി തനിക്ക് മനസ്സിലാകുന്നില്ലെന്ന് വ്യക്തമായി.
സഹപ്രവര്ത്തകരും രോഗികളും യുവതിയുടെ ഇംഗ്ലീഷ് പരിജ്ഞാനത്തില് സംശയം പ്രകടിപ്പിച്ചതോടെ ആശുപത്രി അധികൃതര് അന്വേഷണം നടത്തി. ഒടുവില് തന്റെ മാതൃഭാഷ തെലുങ്കാണെന്നും, ഇംഗ്ലീഷ് മീഡിയത്തില് പഠിച്ചതുകൊണ്ട് ഇംഗ്ലീഷ് മാതൃഭാഷയായി രേഖപ്പെടുത്തിയതാണെന്നും യുവതി സമ്മതിച്ചു. രോഗികളുമായി ആശയവിനിമയം സാധ്യമാകാത്തതിനാല് ആശുപത്രി അധികൃതര് അവരെ പിരിച്ചുവിടുകയായിരുന്നു. ഇന്റര്വ്യൂ സമയത്ത് യുവതി നേരില് വിഡിയോ കോളില് പങ്കെടുക്കാന് വിസമ്മതിക്കുകയും, ചാറ്റ് ബോക്സിലൂടെ ടെക്സ്റ്റ് വഴിയാണ് അഭിമുഖം നടന്നതെന്നും അധികൃതര് വ്യക്തമാക്കി. ഇംഗ്ലീഷ് മീഡിയത്തില് പഠിച്ചതുകൊണ്ട് ഇംഗ്ലീഷ് മാതൃഭാഷയായി കാണിക്കാനാവില്ലെന്നും, തെറ്റിദ്ധരിപ്പിച്ച് ജോലി നേടിയതിനാല് യുവതി യോഗ്യമല്ലെന്നുമാണ് ആശുപത്രിയുടെ നിലപാട്. ഈ സംഭവം വിദേശരാജ്യങ്ങളില് ജോലി തേടുന്നവര്ക്ക് ഭാഷയും സംസ്കാരവും മനസ്സിലാക്കുന്നതിന്റെ നിര്ണായകതയെ വീണ്ടും ഓര്മ്മപ്പെടുത്തുന്നു.
