കൊല്ലം: വിനോദയാത്ര പുറപ്പെടുന്നതിന് മുമ്പ് ബസിന് മുകളില്‍ അപകടകരമായ രീതിയില്‍ പൂത്തിരി കത്തിച്ച് അഭ്യാസപ്രകടനം. കൊല്ലം പെരുമണ്‍ എന്‍ജിനിയറിങ് കോളജില്‍ കഴിഞ്ഞ ദിവസമാണ് സംഭവം. പൂത്തിരിയില്‍ നിന്ന് തീ ബസിലേക്ക് പടര്‍ന്നു.വിനോദയാത്രയ്ക്ക് മുമ്പ് വിദ്യാര്‍ത്ഥികളെ ആവേശംകൊള്ളിക്കാനായിരുന്നു ബസ് ജീവനക്കാരുടെ പ്രകടനം. യാത്രയ്ക്കായി രണ്ട് കമ്പനികളുടെ ബസ്സാണ് വിദ്യാര്‍ത്ഥികള്‍ ബുക്ക് ചെയ്തിരുന്നത്. ബസുകള്‍ തമ്മിലുള്ള മത്സരമാണ് വലിയ അപകടത്തിന് വഴിവയ്ക്കാമായിരുന്ന സംഭവത്തിലേക്ക് കടന്നത്. തീ പടര്‍ന്നയുടന്‍ ബസ് ജീവനക്കാരന്‍ മുകളില്‍ കയറി തീ അണയ്ക്കുകയായിരുന്നു.സംഭവത്തില്‍ കോളജിന് പങ്കില്ലെന്നും ബസ് ജീവനക്കാരാണ് ഉത്തരവാദികളെന്നും പ്രിന്‍സിപ്പല്‍ പ്രതികരിച്ചു. ബസ് വയനാട് വഴി കര്‍ണാടകയിലേക്ക് പോയിരിക്കുകയാണെന്നും ഉടമയെ കണ്ടെത്തിയെന്നും മോട്ടോര്‍ വാഹന വകുപ്പ് ഉദ്യോഗസ്ഥര്‍ പറഞ്ഞു. കൊമ്പന്‍ എന്ന പേരിലെ ബസ്സിലാണ് അപകടകരമായ അഭ്യാസപ്രകടനം അരങ്ങേറിയത്.
