സ്‌കോട്ട്‌ലാന്‍ഡ്: 2026ലെ സ്‌കോട്ട്‌ലാന്‍ഡ് പാര്‍ലമെന്റ് തിരഞ്ഞെടുപ്പിന് മുന്നോടിയായി എഡിന്‍ബറോയില്‍ നടന്ന സ്‌കോട്ടിഷ് നാഷനല്‍ പാര്‍ട്ടി (എസ്.എന്‍.പി) ഫണ്ട് റെയ്‌സിങ് കണ്‍വന്‍ഷനില്‍ പ്രധാന ചര്‍ച്ചാവിഷയം സ്ഥാനാര്‍ഥിയോ രാഷ്ട്രീയ പ്രമേയമോ ആയിരുന്നില്ല. മറിച്ച്, 'മണവാട്ടി' എന്ന പേരില്‍ ലേലത്തിന് വെച്ച ഒരു മദ്യക്കുപ്പിയാണ് ശ്രദ്ധാകേന്ദ്രമായത്.
മലയാളി ബ്രാന്‍ഡിന്റെ കൗതുകം
- എസ്.എന്‍.പി സ്ഥാനാര്‍ഥി മാര്‍ട്ടിന്‍ ഡേയുടെ തിരഞ്ഞെടുപ്പ് ഫണ്ട് ശേഖരണാര്‍ഥം സംഘടിപ്പിച്ച ചടങ്ങിലാണ് ഈ സ്‌പെഷല്‍ എഡിഷന്‍ ബോട്ടില്‍ അവതരിപ്പിച്ചത്.
- സ്‌കോട്ടിഷ് ഫസ്റ്റ് മിനിസ്റ്റര്‍ ജോണ്‍ സ്വിന്നിയും 'മണവാട്ടി വാറ്റ്' ഉടമ ജോണ്‍ സേവ്യര്‍യും ചേര്‍ന്ന് ഒപ്പിട്ട ബോട്ടിലാണ് ലേലത്തില്‍ ശ്രദ്ധേയമായത്.
- സ്‌കോട്ടിഷ് രാഷ്ട്രീയത്തിലെ ഉന്നതന്റെ കയ്യൊപ്പുള്ള ഈ മലയാളി ബ്രാന്‍ഡ് സ്വന്തമാക്കാന്‍ വലിയ മത്സരമാണ് നടന്നത്.
'അഡോപ്ഷന്‍ നൈറ്റ്' പാരമ്പര്യത്തില്‍
- 1970കളിലെ പഴയൊരു രാഷ്ട്രീയ പാരമ്പര്യത്തെ ഓര്‍മ്മിപ്പിക്കുന്ന 'അഡോപ്ഷന്‍ നൈറ്റ്' വേദിയിലായിരുന്നു 'മണവാട്ടി' അവതരിപ്പിച്ചത്.
- സ്ഥാനാര്‍ഥിയെ പാര്‍ട്ടി ഔദ്യോഗികമായി ഏറ്റെടുക്കുന്ന പഴയകാല ചടങ്ങ് പുനരാവിഷ്‌കരിച്ച പരിപാടിക്ക് പ്രമുഖരുടെ വലിയ നിര സാക്ഷിയായി.
- സ്‌കോട്ടിഷ് കാബിനറ്റ് മന്ത്രിമാരായ ഫിയോണ ഹിസ്ലോപ്പ്, മിഷേല്‍ തോംസണ്‍, മുന്‍ ഗതാഗതമന്ത്രി സ്റ്റുവര്‍ട്ട് സ്റ്റീവന്‍സണ്‍ ഉള്‍പ്പെടെയുള്ളവര്‍ ചടങ്ങില്‍ പങ്കെടുത്തു.
- അഞ്ചോളം സ്ഥാനാര്‍ഥികളും നിരവധി ഇന്ത്യന്‍ വംശജരും ചടങ്ങില്‍ പങ്കെടുത്തതോടെ വേദി ഇന്ത്യയുടെ ഒരു ചെറിയ പതിപ്പായി മാറി.
- സംഗീതജ്ഞരുടെ കലാപരിപാടികളും വിഭവസമൃദ്ധമായ വിരുന്നും ചടങ്ങിന് മാറ്റുകൂട്ടി.
മലയാളി ഉടമസ്ഥത
- കൊച്ചി കടവന്ത്ര ചിലവന്നൂര്‍ സ്വദേശിയായ ജോണ്‍ സേവ്യര്‍ ആണ് ബ്രാന്‍ഡിന്റെ ഉടമ.
- കേരളത്തിലെ നാടന്‍ വാറ്റ് രീതികളെ ആധുനിക മദ്യ നിര്‍മാണ രീതികളുമായി സംയോജിപ്പിച്ചാണ് 'മണവാട്ടി' യുകെയില്‍ പുറത്തിറക്കിയത്.
- ലണ്ടന്‍ ബാരണ്‍ ലിമിറ്റഡ് കമ്പനിയുടെ കീഴിലാണ് ബ്രാന്‍ഡ് വിപണിയിലെത്തിയത്.
സ്‌കോട്ടിഷ് രാഷ്ട്രീയ വേദിയില്‍ മലയാളി ബ്രാന്‍ഡ് 'മണവാട്ടി'യുടെ സാന്നിധ്യം, സംസ്‌കാരങ്ങളുടെ സംഗമമായി മാറിയ ചടങ്ങിന് പ്രത്യേക നിറം നല്‍കി.
