ലണ്ടന്‍: റഷ്യയില്‍ നിന്നുള്ള യുദ്ധഭീഷണി നേരിടാന്‍ സൈന്യം മാത്രം പോര, രാജ്യത്തെ മുഴുവന്‍ ജനങ്ങളും സജ്ജരാകണമെന്ന് യുകെ സൈനിക മേധാവി മുന്നറിയിപ്പ് നല്‍കി. ശീതയുദ്ധകാലത്തിന് ശേഷം ഇതാദ്യമായാണ് ബ്രിട്ടീഷ് ജനതയ്ക്ക് ഇത്തരത്തിലുള്ള ഗൗരവകരമായ ജാഗ്രതാ നിര്‍ദേശം നല്‍കുന്നത്.

ചടങ്ങില്‍ പ്രഖ്യാപനം

- തിങ്കളാഴ്ച ലണ്ടനിലെ റോയല്‍ യുണൈറ്റഡ് സര്‍വീസസ് ഇന്‍സ്റ്റിറ്റ്യൂട്ടില്‍ (RUSI) നടക്കുന്ന ചടങ്ങില്‍ എയര്‍ ചീഫ് മാര്‍ഷല്‍ സര്‍. റിച്ചാര്‍ഡ് നൈറ്റണ്‍ രാജ്യത്തെ അഭിസംബോധന ചെയ്യും.

പ്രധാന മുന്നറിയിപ്പുകള്‍

- എല്ലാവരും പങ്കാളികളാകണം: പ്രതിരോധം സൈന്യത്തിന്റെ മാത്രം ഉത്തരവാദിത്തമല്ല. NHS, ഗതാഗതം, വ്യവസായം, സര്‍വകലാശാലകള്‍ തുടങ്ങി സിവില്‍ സമൂഹത്തിലെ എല്ലാ മേഖലകളും യുദ്ധസാഹചര്യം നേരിടാന്‍ 'ഓള്‍-ഇന്‍ മെന്റാലിറ്റി' കൈവരിക്കണം.

- നാറ്റോ ലക്ഷ്യം: വ്‌ലാഡിമിര്‍ പുട്ടിന്റെ ഉദ്ദേശം നാറ്റോ സഖ്യത്തെ തകര്‍ക്കുക എന്നതാണെന്നും, അത് യുകെയുടെ സുരക്ഷയ്ക്ക് നേരിട്ടുള്ള ഭീഷണിയാണെന്നും നൈറ്റണ്‍ വ്യക്തമാക്കി.

- MI6 മുന്നറിയിപ്പ്: 'യുദ്ധമുഖം ഇപ്പോള്‍ അതിര്‍ത്തികളില്‍ മാത്രമല്ല, എല്ലായിടത്തുമാണ്' എന്ന മുന്നറിയിപ്പുമായി MI6-ന്റെ പുതിയ മേധാവി ബ്ലെയ്‌സ് മെട്രെവെലി രംഗത്തെത്തി. ഒക്ടോബറില്‍ ചുമതലയേറ്റ മെട്രെവെലി, യുകെയുടെ ചാരസംഘടനയുടെ ആദ്യ വനിതാ മേധാവിയാണ്.

മാറുന്ന ലോകം, മാറേണ്ട രീതികള്‍

- രണ്ടാം ലോകമഹായുദ്ധത്തിന് ശേഷം രാജ്യം കണ്ടിട്ടില്ലാത്ത വിധം അപകടകരമായ അവസ്ഥയിലൂടെയാണ് കടന്നുപോകുന്നതെന്ന് നാറ്റോ മേധാവി മാര്‍ക്ക് റുട്ടെ കഴിഞ്ഞ ആഴ്ച മുന്നറിയിപ്പ് നല്‍കിയിരുന്നു.

- ശീതയുദ്ധകാലത്ത് യുദ്ധസാഹചര്യങ്ങളില്‍ പ്രവര്‍ത്തിക്കേണ്ട രീതികളെക്കുറിച്ച് 'ഗവണ്‍മെന്റ് വാര്‍ ബുക്ക്' നിലവിലുണ്ടായിരുന്നു. സോവിയറ്റ് യൂണിയന്‍ തകര്‍ന്നതോടെ അത് ഉപേക്ഷിച്ചിരുന്നുവെങ്കിലും, ഇപ്പോഴത്തെ സാഹചര്യത്തില്‍ രാജ്യം വീണ്ടും 'വാര്‍ ഫൂട്ടിങ്ങിലേക്ക്' മാറേണ്ടതിന്റെ സൂചനയാണ് പുതിയ പ്രസ്താവനകള്‍ നല്‍കുന്നത്.

- പ്രതിരോധ ബജറ്റ് ജിഡിപിയുടെ 3.5 ശതമാനമായി ഉയര്‍ത്താന്‍ 10 വര്‍ഷമെടുക്കുമെന്ന സര്‍ക്കാര്‍ നിലപാട് വളരെ സാവധാനത്തിലുള്ളതാണെന്നും, ഭീഷണി നേരിടാന്‍ ഇത് മതിയാകില്ലെന്നും മുതിര്‍ന്ന സൈനിക ഉദ്യോഗസ്ഥര്‍ അഭിപ്രായപ്പെട്ടു