ലണ്ടന്‍: ലണ്ടനിലെ ഇറാനിയന്‍ എംബസി കെട്ടിടത്തിന് മുകളില്‍ അതിക്രമിച്ചു കയറിയ പ്രതിഷേധക്കാരന്‍ രാജ്യത്തിന്റെ ഔദ്യോഗിക പതാക മാറ്റി 1979-ലെ ഇസ്ലാമിക വിപ്ലവത്തിന് മുമ്പ് ഇറാനില്‍ നിലനിന്നിരുന്ന 'സിംഹവും സൂര്യനും' അടയാളമുള്ള പതാക ഉയര്‍ത്തി. സംഭവത്തെത്തുടര്‍ന്ന് സ്ഥലത്തെത്തിയ ലണ്ടന്‍ മെട്രോപൊളിറ്റന്‍ പോലീസ് രണ്ട് പേരെ അറസ്റ്റ് ചെയ്തു.

കെന്‍സിങ്ടണിലെ എംബസി കെട്ടിടത്തിന്റെ മുന്‍വശത്തെ ബാല്‍ക്കണിയിലേക്ക് കയറിയ പ്രതിഷേധക്കാരന്‍ പതാക മാറ്റിയപ്പോള്‍, താഴെ തടിച്ചുകൂടിയിരുന്നവര്‍ കൈയടികളോടും മുദ്രാവാക്യങ്ങളോടും കൂടിയാണ് പ്രതികരിച്ചത്. സംഭവത്തിന്റെ ദൃശ്യങ്ങള്‍ സാമൂഹിക മാധ്യമങ്ങളില്‍ വ്യാപകമായി പ്രചരിക്കുന്നുണ്ട്.

പോലീസ് അന്വേഷണം തുടരുന്നു

സംഭവവുമായി ബന്ധപ്പെട്ട് മൂന്നാമതൊരു വ്യക്തിക്കായി പോലീസ് തിരച്ചില്‍ നടത്തിവരികയാണ്. പതാക മാറ്റിയ വ്യക്തി അറസ്റ്റിലായവരില്‍ ഉള്‍പ്പെട്ടിട്ടുണ്ടോ എന്ന് വ്യക്തമാക്കിയിട്ടില്ല. അതേസമയം, ലണ്ടനിലെ ഇറാനിയന്‍ എംബസി ഇതുവരെ ഔദ്യോഗികമായി പ്രതികരിച്ചിട്ടില്ല.

ഇറാനിലെ ഭരണകൂടവിരുദ്ധ പ്രക്ഷോഭങ്ങളുടെ പ്രതിഫലം

ഇറാനില്‍ ഇപ്പോള്‍ നടക്കുന്ന ശക്തമായ ഭരണകൂടവിരുദ്ധ പ്രക്ഷോഭങ്ങളുടെ തുടര്‍ച്ചയായാണ് ലണ്ടനിലും പ്രതിഷേധം ഉണ്ടായത്. സാമ്പത്തിക പ്രതിസന്ധികളെത്തുടര്‍ന്ന് ഡിസംബര്‍ 28-ന് ഇറാനില്‍ ആരംഭിച്ച പ്രതിഷേധം ഭരണകൂടത്തിന് നേരെയുള്ള വലിയ വെല്ലുവിളിയായി മാറിയിരിക്കുകയാണ്.

റിപ്പോര്‍ട്ടുകള്‍ പ്രകാരം, ഇതുവരെ ഇറാനില്‍ 72 പേര്‍ കൊല്ലപ്പെടുകയും 2,300-ലധികം പേര്‍ തടവിലാക്കപ്പെടുകയും ചെയ്തിട്ടുണ്ട്. പ്രതിഷേധങ്ങളെ അടിച്ചമര്‍ത്തുന്നതിനായി ഇറാന്‍ അധികൃതര്‍ രാജ്യത്തുടനീളം ഇന്റര്‍നെറ്റ് വിച്ഛേദിച്ചിരിക്കുകയാണ്