തിരുവനന്തപുരം: സിഎംആര്‍എല്‍-എക്സാലോജിക് സാമ്പത്തിക ഇടപാടുമായി ബന്ധപ്പെട്ട കേസില്‍ മുന്‍ മുഖ്യമന്ത്രിയും നിലവിലെ പ്രതിപക്ഷ നേതാവുമായ പിണറായി വിജയന്‍, മുന്‍മന്ത്രി പി.എ. മുഹമ്മദ് റിയാസ് എന്നിവര്‍ക്കെതിരെ അന്വേഷണം ആരംഭിക്കുന്ന കാര്യത്തില്‍ സംസ്ഥാന സര്‍ക്കാര്‍ നിര്‍ണായക തീരുമാനത്തിലേക്ക്. എന്‍ഫോഴ്സ്മെന്റ് ഡയറക്ടറേറ്റ് (ഇഡി) സംസ്ഥാന പൊലീസ് മേധാവിക്ക് കൈമാറിയ റിപ്പോര്‍ട്ടിന്റെ അടിസ്ഥാനത്തില്‍ അന്വേഷണം നടത്തുന്നതിന് നിയമതടസമില്ലെന്ന നിയമോപദേശം ലഭിച്ചതിന് പിന്നാലെയാണ് സര്‍ക്കാര്‍ തുടര്‍നടപടികള്‍ പരിശോധിക്കുന്നത്. മുഖ്യമന്ത്രി വി.ഡി. സതീശനും ആഭ്യന്തരമന്ത്രി രമേശ് ചെന്നിത്തലയും വിഷയം ചര്‍ച്ച ചെയ്യുന്നതിനായി കൂടിക്കാഴ്ച നടത്തിയതായാണ് റിപ്പോര്‍ട്ട്. എഫ്ഐആര്‍ നേരിട്ട് രജിസ്റ്റര്‍ ചെയ്യണോ, ആദ്യം പ്രാഥമിക അന്വേഷണം നടത്തണോ, പ്രത്യേക അന്വേഷണസംഘത്തെ നിയോഗിക്കണോ തുടങ്ങിയ കാര്യങ്ങളാണ് സര്‍ക്കാര്‍ പരിശോധിക്കുന്നത്.
അഴിമതി നിരോധന നിയമപ്രകാരം കേസെടുക്കുന്നത് പരിഗണിക്കണമെന്ന് ആവശ്യപ്പെട്ട് ഇഡി സെപ്റ്റംബര്‍ ആദ്യവാരത്തിലാണ് സംസ്ഥാന പൊലീസ് മേധാവിക്ക് റിപ്പോര്‍ട്ട് കൈമാറിയത്. പിണറായി വിജയന്‍, മകള്‍ ടി. വീണ, മുഹമ്മദ് റിയാസ് എന്നിവര്‍ക്കെതിരെ നടപടിയെടുക്കണമെന്നാണ് ഇഡിയുടെ ആവശ്യം. ഇഡി കൈമാറിയ വിവരങ്ങളില്‍ കുറ്റകൃത്യത്തിന്റെ പ്രാഥമിക ഘടകങ്ങള്‍ കണ്ടെത്തിയാല്‍ എഫ്ഐആര്‍ രജിസ്റ്റര്‍ ചെയ്യാമെന്നും അല്ലാത്തപക്ഷം പ്രാഥമിക പരിശോധന നടത്താമെന്നുമാണ് നിയമോപദേശത്തിലെ നിലപാട്.
?3.28 കോടി സംബന്ധിച്ച് ഇഡിയുടെ ആരോപണം
2017 മാര്‍ച്ച് മുതല്‍ 2019 മേയ് വരെയുള്ള കാലയളവില്‍ സിഎംആര്‍എല്ലില്‍ നിന്ന് ടി. വീണയ്ക്കും അവരുടെ കമ്പനിയായ എക്സാലോജിക് സൊല്യൂഷന്‍സിനും ലഭിച്ച പണം യഥാര്‍ഥ സേവനങ്ങള്‍ക്ക് നല്‍കിയതല്ലെന്നും അത് പിണറായി വിജയനുമായി ബന്ധമുള്ള അനധികൃത സാമ്പത്തിക നേട്ടമായിരുന്നുവെന്നുമാണ് ഇഡിയുടെ ആരോപണം. ഇഡി റിപ്പോര്‍ട്ടില്‍ ?3.28 കോടിയുടെ ഇടപാടാണ് പ്രധാനമായും ചൂണ്ടിക്കാട്ടിയിരിക്കുന്നത്. എന്നാല്‍ ഈ ആരോപണങ്ങള്‍ ഇതുവരെ കോടതിയില്‍ അന്തിമമായി തെളിയിക്കപ്പെട്ടിട്ടില്ല. അഴിമതി നിരോധന നിയമത്തിലെ വ്യവസ്ഥകള്‍ പ്രകാരം ഈ ആരോപണങ്ങളില്‍ അന്വേഷണം നടത്താമെന്നാണ് സര്‍ക്കാരിന് ലഭിച്ച നിയമോപദേശത്തില്‍ പറയുന്നതെന്ന് വിവിധ റിപ്പോര്‍ട്ടുകള്‍ വ്യക്തമാക്കുന്നു. മുഹമ്മദ് റിയാസുമായി ബന്ധപ്പെട്ട സാമ്പത്തിക ഇടപാട് ആരോപണങ്ങളും അന്വേഷണ പരിധിയില്‍ ഉള്‍പ്പെടുത്താമെന്നാണ് നിയമോപദേശം.
അതേസമയം, ഇഡി ആശ്രയിച്ച ചില മൊഴികള്‍ പിന്നീട് സിഎംആര്‍എല്‍ ഉദ്യോഗസ്ഥര്‍ പിന്‍വലിച്ചിട്ടുണ്ടെന്നതും കേസിലെ പ്രധാന ഘടകമാണ്. തങ്ങളുടെ മൊഴികള്‍ സമ്മര്‍ദത്തിലൂടെ രേഖപ്പെടുത്തിയതാണെന്നാണ് ഉദ്യോഗസ്ഥരുടെ ആരോപണം. ഇഡി ഈ ആരോപണം നിഷേധിച്ചിട്ടുണ്ട്. അതിനാല്‍ ഇഡി റിപ്പോര്‍ട്ടിലെ രേഖകളും മൊഴികളും അവയുടെ പിന്‍വലിക്കലുകളും ഉള്‍പ്പെടെ പരിശോധിച്ചശേഷം തുടര്‍നടപടി സ്വീകരിക്കണമെന്ന നിലപാടും സര്‍ക്കാര്‍ പരിഗണിക്കുന്നുണ്ട്. പിണറായി വിജയനും കുടുംബവും സിപിഎമ്മും ഇഡിയുടെ ആരോപണങ്ങള്‍ നേരത്തെ നിഷേധിച്ചിട്ടുണ്ട്. സര്‍ക്കാര്‍ ഏത് അന്വേഷണരീതിയാണ് സ്വീകരിക്കുക, നേരിട്ട് എഫ്ഐആര്‍ രജിസ്റ്റര്‍ ചെയ്യുമോ അതോ പ്രാഥമിക അന്വേഷണത്തിന് പ്രത്യേക സംഘത്തെ നിയോഗിക്കുമോ എന്നതിലാണ് ഇനി ശ്രദ്ധ.
