ദുബൈ: വിമാനത്താവളങ്ങളിലെ യാത്രക്കാരുടെ ചെക്ക്-ഇന്‍ നടപടികളും ബാഗേജ് കൈകാര്യം ചെയ്യലും കൂടുതല്‍ വേഗത്തിലും കാര്യക്ഷമമായും നടത്താന്‍ പുതിയ തലമുറ റോബോട്ടുകളുമായി എമിറേറ്റ്സ് ഗ്രൂപ്പ്. മനുഷ്യസഹായമില്ലാതെ സ്വയം പ്രവര്‍ത്തിക്കാന്‍ ശേഷിയുള്ള 'സാറ' എന്ന റോബോട്ടിന്റെ നവീകരിച്ച പതിപ്പാണ് ഇതിനായി വികസിപ്പിക്കുന്നത്. 2027 ആദ്യ പാദത്തില്‍ സംവിധാനം പുറത്തിറക്കാനാണ് ലക്ഷ്യമിടുന്നതെന്ന് അധികൃതര്‍ അറിയിച്ചു.
ഫേഷ്യല്‍ റെക്കഗ്നിഷന്‍, പാസ്‌പോര്‍ട്ട് സ്‌കാനിങ് തുടങ്ങിയ സാങ്കേതികവിദ്യകള്‍ ഉപയോഗിച്ച് യാത്രക്കാരുടെ ചെക്ക്-ഇന്‍ നടപടികള്‍ പൂര്‍ത്തിയാക്കാന്‍ കഴിയുന്ന 'സാറ'യുടെ ആദ്യ പതിപ്പ് നേരത്തെ എമിറേറ്റ്സ് അവതരിപ്പിച്ചിരുന്നു. ഇതിന്റെ വിജയത്തെ തുടര്‍ന്നാണ് കൂടുതല്‍ സാങ്കേതിക ശേഷികളോടെ അടുത്ത തലമുറ റോബോട്ടിനെ വികസിപ്പിക്കുന്നത്. വിമാനത്താവളത്തിലെത്തുന്ന യാത്രക്കാരുടെ മുഖം സ്‌കാന്‍ ചെയ്ത് തിരിച്ചറിയാന്‍ പുതിയ റോബോട്ടുകള്‍ക്ക് കഴിയും. തുടര്‍ന്ന് യാത്രക്കാരില്‍ നിന്ന് ബാഗേജ് സ്വീകരിക്കുകയും അതിന്റെ തൂക്കം പരിശോധിക്കുകയും ചെയ്യും. മനുഷ്യ ഇടപെടലില്ലാതെ ബാഗേജ് ടാഗ് പതിപ്പിച്ച് ലഗേജ് ട്രാന്‍സ്പോര്‍ട്ട് സംവിധാനത്തിലേക്ക് നേരിട്ട് അയയ്ക്കാനും റോബോട്ടിന് സാധിക്കും.
ഈ സാങ്കേതികവിദ്യ വികസിപ്പിക്കുന്നതിനായി പ്രത്യേക റോബോട്ടിക്‌സ് ലാബും എമിറേറ്റ്സ് ഗ്രൂപ്പ് സജ്ജീകരിച്ചിട്ടുണ്ട്. വിമാനയാത്രാ സേവനങ്ങള്‍ക്ക് പുറമെ കാര്‍ഗോ, ലോജിസ്റ്റിക്‌സ് മേഖലകളിലും ഓട്ടോമേഷന്‍, നിര്‍മിതബുദ്ധി എന്നിവയുടെ ഉപയോഗം വര്‍ധിപ്പിക്കാനുള്ള നടപടികള്‍ ഗ്രൂപ്പ് സ്വീകരിച്ചുവരികയാണ്. എമിറേറ്റ്സ് ഗ്രൂപ്പിന്റെ വാര്‍ഷിക ഇന്നൊവേഷന്‍ മേളയായ **'ഫോര്‍സടെക് 2026'**ന്റെ നാലാം പതിപ്പില്‍ സംസാരിക്കവെയാണ് എമിറേറ്റ്സ് ഇന്നൊവേഷന്‍ ആന്‍ഡ് ന്യൂ ടെക്നോളജീസ് വൈസ് പ്രസിഡന്റ് കീനന്‍ ഹംസ പുതിയ പദ്ധതിയുടെ വിശദാംശങ്ങള്‍ വെളിപ്പെടുത്തിയത്. വിമാനത്താവളങ്ങളിലെ കാത്തിരിപ്പ് സമയം കുറയ്ക്കുകയും ചെക്ക്-ഇന്‍, ബാഗേജ് നടപടികള്‍ കൂടുതല്‍ സുഗമമാക്കുകയും ചെയ്യുന്നതില്‍ പുതിയ തലമുറ 'സാറ' നിര്‍ണായക മാറ്റം കൊണ്ടുവരുമെന്നാണ് എമിറേറ്റ്സിന്റെ പ്രതീക്ഷ.
