ലണ്ടന്‍: ശമ്പളവര്‍ധനയും ജോലിസമയം കുറയ്ക്കലും ആവശ്യപ്പെട്ട് സീനിയര്‍ എന്‍എച്ച്എസ് ഡോക്ടര്‍മാര്‍ പ്രഖ്യാപിച്ച രണ്ടുദിവസത്തെ പണിമുടക്കിനെതിരെ വിമര്‍ശനം. കണ്‍സള്‍ട്ടന്റ് ഡോക്ടര്‍മാരില്‍ പത്തിലൊരാള്‍ക്ക് പ്രതിവര്‍ഷം രണ്ട് ലക്ഷം പൗണ്ടിലധികം വരുമാനമുണ്ടെന്ന കണക്കുകള്‍ പുറത്തുവന്നതോടെയാണ് ചര്‍ച്ച ശക്തമായത്. എന്‍എച്ച്എസില്‍ ഏകദേശം 66,759 കണ്‍സള്‍ട്ടന്റുമാരാണ് പ്രവര്‍ത്തിക്കുന്നത്. ഇവരില്‍ ആറായിരത്തിലധികം പേര്‍ക്ക് വാര്‍ഷിക വരുമാനം രണ്ട് ലക്ഷം പൗണ്ടിന് മുകളിലാണെന്നാണ് പുറത്തുവന്ന കണക്കുകള്‍ സൂചിപ്പിക്കുന്നത്. ഉയര്‍ന്ന വരുമാനമുള്ള ഡോക്ടര്‍മാരുടെ വേതനം ചൂണ്ടിക്കാട്ടിയാണ് സമരത്തിനെതിരെ വിമര്‍ശനം ഉയരുന്നത്.

അടുത്ത വര്‍ഷത്തേക്ക് നിര്‍ദേശിച്ച 2.4 ശതമാനം ശമ്പളവര്‍ധന നിരസിച്ചാണ് ബ്രിട്ടീഷ് മെഡിക്കല്‍ അസോസിയേഷന്‍ (ബിഎംഎ) സമരം പ്രഖ്യാപിച്ചത്. ഉടന്‍ 16,000 പൗണ്ടിന്റെ ശമ്പളവര്‍ധന അനുവദിക്കണമെന്നും ആഴ്ചയിലെ ജോലിസമയം അഞ്ച് മണിക്കൂര്‍ കുറയ്ക്കണമെന്നുമാണ് സംഘടനയുടെ ആവശ്യങ്ങള്‍. ശൈത്യകാലത്തിന് മുന്നോടിയായി രണ്ടുദിവസം പണിമുടക്കുന്നതിന് കണ്‍സള്‍ട്ടന്റുമാര്‍ വോട്ട് ചെയ്തതിനു പിന്നാലെയാണ് വരുമാനവിവരങ്ങള്‍ പുറത്തുവന്നത്. ആശുപത്രികളില്‍ തിരക്ക് വര്‍ധിക്കുന്ന സമയത്തെ സമരവും ഡോക്ടര്‍മാരുടെ വേതനാവശ്യങ്ങളും എന്‍എച്ച്എസിനെക്കുറിച്ചുള്ള പൊതുചര്‍ച്ചയില്‍ വീണ്ടും ഇടംപിടിച്ചിരിക്കുകയാണ്.