ഏഷ്യാ കപ്പ് ഫൈനലില് ഇന്ത്യയ്ക്ക് തകര്പ്പന് വിജയം. ശ്രീലങ്കയെ പത്തു വിക്കറ്റിന് പരാജയപ്പെടുത്തി ഇന്ത്യ എട്ടാം കിരീടം സ്വന്തമാക്കി. ചരിത്രമുറങ്ങുന്ന പ്രേമദാസ സ്റ്റേഡിയത്തില് ഏഷ്യയുടെ ക്രിക്കറ്റ് രാജാക്കന്മാരായി വീണ്ടും ഇന്ത്യ. ശ്രീലങ്കയെ അവരുടെ മണ്ണില് 10 വിക്കറ്റിന് തകര്ത്താണ് ഇന്ത്യയുടെ എട്ടാം ഏഷ്യാകപ്പ് കിരീടനേട്ടം. ടോസ് നേടി ആദ്യം ബാറ്റുചെയ്ത ശ്രീലങ്കന് സ്കോര് 50 റണ്സില് ഒതുങ്ങിയിരുന്നു. മറുപടി ബാറ്റിങ്ങില് വെറും 6.1 ഓവറില് ഇന്ത്യ ലക്ഷ്യം മറികടക്കുകയായിരുന്നു. ഓപ്പണറായി ഇറങ്ങിയ ശുഭ്മാന് ഗില് 27 റണ്സും ഇഷാന് കിഷന് 23 റണ്സും നേടി.
അഞ്ചു വര്ഷത്തിനു ശേഷമാണ് ഇന്ത്യ ഏഷ്യാ കപ്പ് കിരീടത്തില് മുത്തമിടുന്നത്. 2018-ലാണ് ഇന്ത്യ അവസാനമായി ടൂര്ണമെന്റില് വിജയിക്കുന്നത്. ടോസ് നേടി ബാറ്റിങ്ങിനിറങ്ങിയ ശ്രീലങ്ക 15.2 ഓവറില് 50 റണ്സിന് ഓള്ഔട്ടാവുകയായിരുന്നു. മുഹമ്മദ് സിറാജാണ് ശ്രീലങ്കയെ വരിഞ്ഞുമുറുക്കിയത്. 21 റണ്സ് വഴങ്ങി ആറു വിക്കറ്റാണ് താരം നേടിയത്. ഇന്നിങ്സിന്റെ മൂന്നാം പന്തില് കുശാല് പെരേരയെ പുറത്താക്കി ജസ്പ്രീത് ബുംറ തുടക്കമിട്ട വിക്കറ്റ് വേട്ട നാലാം ഓവര് മുതല് സിറാജ് ഏറ്റെടുക്കുകയായിരുന്നു. |