ബ്രിട്ടനില്‍ അടുത്ത ദിവസം തന്നെ പൊതുതെരഞ്ഞെടുപ്പ് നടന്നാല്‍ റിഫോം യുകെ ഭൂരിപക്ഷം നേടി അധികാരത്തിലേറും എന്ന സൂചനയുമായി പുതിയ മെഗാ സര്‍വേ. നിഗല്‍ ഫരാഗിന്റെ നേതൃത്വത്തിലുള്ള റിഫോം യുകെ 445 സീറ്റുകള്‍ വരെ നേടാനാണ് സാധ്യതയെന്ന് സര്‍വേ വ്യക്തമാക്കുന്നു. അതേസമയം, ടോറികള്‍ക്ക് വെറും 7 സീറ്റുകള്‍ മാത്രമേ ലഭിക്കുകയുള്ളൂവെന്ന് റിപ്പോര്‍ട്ട്.

ലേബര്‍ പാര്‍ട്ടിക്ക് വന്‍ തകര്‍ച്ച ലേബര്‍ പാര്‍ട്ടി 73 സീറ്റുകളിലേക്ക് ചുരുങ്ങുമെന്നാണ് സര്‍വേ പ്രവചനം. ഫരാഗ് പ്രധാനമന്ത്രിയായേക്കാമെന്ന സാഹചര്യം വന്നാല്‍ വോട്ടര്‍മാര്‍ തങ്ങളുടെ നിലപാട് മാറ്റുമെന്നും സര്‍വേ സൂചിപ്പിക്കുന്നു. ലേബര്‍ വോട്ടര്‍മാരില്‍ 20% പേര്‍ റിഫോമിനെ തടയാന്‍ ടോറികളെ പിന്തുണയ്ക്കുമെന്ന് അഭിപ്രായപ്പെട്ടു.

മറ്റു പാര്‍ട്ടികളുടെ സ്ഥിതി

- ലിബറല്‍ ഡെമോക്രാറ്റുകള്‍: 42 സീറ്റുകള്‍

- സ്‌കോട്ടിഷ് നാഷണല്‍ പാര്‍ട്ടി (SNP): 41

- ജെറമി കോര്‍ബിന്റെ യുവര്‍ പാര്‍ട്ടി: 13

- ഗ്രീന്‍ പാര്‍ട്ടി: 6

- പ്ലെയ്ഡ് സിമ്രു: 5

മുന്‍നിര നേതാക്കള്‍ക്ക് തോല്‍വിയുടെ ഭീഷണി റിഫോമിന്റെ സ്ഥാനാര്‍ഥികള്‍ ലേബറും കണ്‍സര്‍വേറ്റീവും ഉള്‍പ്പെടെയുള്ള മുതിര്‍ന്ന നേതാക്കളെ പരാജയപ്പെടുത്തുമെന്ന മുന്നറിയിപ്പാണ് സര്‍വേ നല്‍കുന്നത്. ചാന്‍സലര്‍ റേച്ചല്‍ റീവ്സ്, ഫോറിന്‍ സെക്രട്ടറി വെറ്റ് കൂപ്പര്‍, എഡ്യുക്കേഷന്‍ സെക്രട്ടറി ബ്രിജറ്റ് ഫിലിപ്സണ്‍, എനര്‍ജി സെക്രട്ടറി എഡ് മിലിബന്ദ് എന്നിവര്‍ക്കും ടോറി നേതാവ് കെമി ബാഡെനോക്, മുന്‍ പ്രധാനമന്ത്രി റിഷി സുനാക്, റോബര്‍ട്ട് ജെന്റിക്ക്, സുവെല്ലാ ബ്രാവര്‍മാന്‍, ഇയാന്‍ ഡങ്കന്‍ സ്മിത്ത് എന്നിവര്‍ക്കും പരാജയം നേരിടേണ്ടിവരുമെന്നാണ് പ്രവചനം.

സര്‍വേ വിശദാംശങ്ങള്‍ പിഎല്‍എംആറും ഇലക്ടറല്‍ കാല്‍ക്കുലസും ചേര്‍ന്ന് നടത്തിയ എംആര്‍പി പോള്‍ ഫലമാണ് ഡെയിലി മെയില്‍ പുറത്തുവിട്ടത്. ടോറി കോണ്‍ഫറന്‍സിലെ പ്രധാന പ്രഖ്യാപനങ്ങള്‍ പുറത്തുവരുന്നതിന് മുന്‍പാണ് സര്‍വേ നടന്നത്. അതിനാല്‍ തന്നെ റിഫോമിന്റെ മുന്നേറ്റം തടയാന്‍ മറ്റ് പാര്‍ട്ടികള്‍ക്ക് എളുപ്പമാകില്ലെന്നാണ് രാഷ്ട്രീയ നിരീക്ഷകരുടെ വിലയിരുത്തല്‍.