കൊച്ചി: ചേരാനെല്ലൂരില്‍ കാര്‍ ഇടിച്ച് സ്‌കൂട്ടര്‍ യാത്രികന്‍ മരിച്ച സംഭവത്തില്‍ വാഹനമോടിച്ച പതിനേഴുകാരനെതിരെ നരഹത്യാക്കുറ്റം കൂടി ചുമത്തി. ലൈസന്‍സില്ലാതെ കാറോടിച്ചെന്ന കേസില്‍ പൊലീസ് സ്റ്റേഷന്‍ ജാമ്യം നല്‍കിയ നടപടി വിവാദമായതിനു പിന്നാലെയാണ് കൂടുതല്‍ ഗുരുതരമായ കുറ്റം ചുമത്തിയത്.

ഒക്ടോബര്‍ 25ന് പുലര്‍ച്ചെ 2.20നായിരുന്നു അപകടം. തട്ടുകടയിലെ ജോലി കഴിഞ്ഞ് വീട്ടിലേക്ക് മടങ്ങുകയായിരുന്ന മാഞ്ഞാലി സ്വദേശി ജയബാലകൃഷ്ണന്റെ സ്‌കൂട്ടറില്‍ ബെന്‍സ് കാര്‍ പിന്നില്‍നിന്ന് ഇടിക്കുകയായിരുന്നു. ഇടിയുടെ ആഘാതത്തില്‍ സ്‌കൂട്ടര്‍ തകരുകയും യാത്രികന്‍ റോഡിലേക്ക് തെറിച്ചുവീഴുകയും ചെയ്തു.

ബിഎന്‍എസ് 281, 106(1) വകുപ്പുകള്‍ പ്രകാരമാണ് ആദ്യം കേസെടുത്തത്. ഉച്ചയോടെ പതിനേഴുകാരനെ ജാമ്യത്തില്‍ വിട്ടയച്ചതില്‍ ആഭ്യന്തരമന്ത്രി രമേശ് ചെന്നിത്തല ഡിജിപിയെയും കൊച്ചി സിറ്റി പൊലീസ് കമ്മിഷണറെയും അതൃപ്തി അറിയിച്ചു. കര്‍ശന നടപടിക്ക് നിര്‍ദേശം നല്‍കിയതിനു പിന്നാലെയാണ് നരഹത്യാക്കുറ്റം കൂടി ചേര്‍ത്തത്.

അപകടസമയത്തെ ശക്തമായ മഴയില്‍ റോഡ് വ്യക്തമായി കാണാനായില്ലെന്നാണ് പതിനേഴുകാരന്‍ പൊലീസിന് നല്‍കിയ മൊഴി. ചേരാനെല്ലൂരില്‍ വാഹനം തിരിച്ച് ആലുവ ഭാഗത്തേക്ക് പോകുന്നതിനിടെയാണ് അപകടമുണ്ടായതെന്നും മൊഴിയിലുണ്ട്. വീട്ടുകാര്‍ അറിയാതെയാണ് പാര്‍ക്ക് ചെയ്തിരുന്ന കാറുമായി പുറത്തുപോയതെന്നും വെറുതെ സഞ്ചരിക്കാനാണ് ഇറങ്ങിയതെന്നും പതിനേഴുകാരന്‍ പൊലീസിനോട് പറഞ്ഞതായി റിപ്പോര്‍ട്ടില്‍ പറയുന്നു.