സിപിഎം മുന് സംസ്ഥാന സെക്രട്ടറിയും പോളിറ്റ് ബ്യൂറോ അംഗവും മുന് ആഭ്യന്തരമന്ത്രിയുമായിരുന്ന കോടിയേരി ബാലകൃഷ്ണന് അന്തരിച്ചു. 69 വയസായിരുന്നു. അര്ബുദരോഗത്തെ തുടര്ന്ന് ചികിത്സയിലിരിക്കെ ചെന്നൈ അപ്പോളോ ആശുപത്രിയില്വെച്ച് ഇന്ന് രാത്രി എട്ടരയോടെയാണ് അന്ത്യം. കോടിയേരിയുടെ ഭാര്യ വിനോദിനി, മക്കളായ ബിനോയ്, ബിനീഷ് എന്നിവരും മരണസമയം ആശുപത്രിയിലുണ്ടായിരുന്നു.
കോടിയേരിയുടെ ആരോഗ്യനിലയില് ആശങ്ക ഉയര്ന്നതിനെ തുടര്ന്ന് ഇന്ന് യൂറോപിലേക്ക് പോകാനിരുന്ന മുഖ്യമന്ത്രി പിണറായി വിജയന് യാത്ര റദ്ദാക്കിയിരുന്നു. സിപിഎം സംസ്ഥാന സെക്രട്ടറി എം.വി.ഗോവിന്ദന് അടക്കമുള്ള നേതാക്കള് ചെന്നൈയിലെത്തിയിട്ടുണ്ട്.
എതിരാളികള്ക്കുപോലും സ്വീകാര്യനായിരുന്ന കോടിയേരി യാത്രയായത് കേരളത്തില് സിപിഎമ്മിനും ഇടതുരാഷ്ട്രീയത്തിനും നികത്താനാകാത്ത നഷ്ടമാണ്.
ഓഗസ്റ്റ് 29 ന് പ്രത്യേക എയര് ആംബുലന്സിലാണ് കോടിയേരി ബാലകൃഷ്ണനെ തുടര് ചികിത്സകള്ക്കായി ചെന്നൈ അപ്പോളോ ആശുപത്രിയില് പ്രവേശിപ്പിച്ചത്. കീമോത്തെറാപ്പി ചെയ്ത ക്ഷീണവും രോഗത്തിന്റെ അവശതയും കണക്കിലെടുത്താണ് ചികിത്സ ചെന്നൈയിലേക്ക് മാറ്റിയത്. നേരത്തെ അമേരിക്കയില് ചികിത്സിച്ച ഡോക്ടര്മാരുടെ നിര്ദേശം അനുസരിച്ചായിരുന്നു അപ്പോളോയില് കോടിയേരിയെ ചികിത്സിച്ചുവന്നത്.
കണ്ണൂര് തലശേരി കല്ലറ തലായി എല്.പി. സ്കൂള് അദ്ധ്യാപകന് കോടിയേരി മൊട്ടുമ്മല് കുഞ്ഞുണ്ണിക്കുറുപ്പിന്റേയും നാരായണിയമ്മയുടേയും മകനായി 1953 നവംബര് 16നാണ് ബാലകൃഷ്ണന് ജനിച്ചത്. വിദ്യാര്ഥി പ്രസ്ഥാനത്തിലൂടെ പൊതുപ്രവര്ത്തനത്തിലെത്തിയ ബാലകൃഷ്ണന് കോടിയേരിയിലെ ജൂനിയര് ബേസിക് സ്കൂള്, കോടിയേരി ഓണിയന് ഗവണ്മെന്റ് ഹൈസ്കൂള് എന്നിവിടങ്ങളില് നിന്നുമാണ് സ്കൂള് വിദ്യാഭ്യാസം പൂര്ത്തിയാക്കിയത്. മാഹി മഹാത്മാഗാന്ധി ഗവണ്മെന്റ് കോളേജില് നിന്നും പ്രീഡിഗ്രി വിദ്യാഭ്യാസം പൂര്ത്തിയാക്കി. തിരുവനന്തപുരം യൂണിവേഴ്സിറ്റി കോളേജില് നിന്നും ബിരുദപഠനം പൂര്ത്തിയാക്കി. |