മലപ്പുറം താനൂരിലെ ബോട്ടപകടത്തിനിടയാക്കിയ ബോട്ടിന്റെ ഉടമ അറസ്റ്റില്. ബോട്ടുടമ നാസര് ആണ് അറസ്റ്റിലായത്. കോഴിക്കോട് നിന്നാണ് ഇയാളെ പൊലീസ് അറസ്റ്റ് ചെയ്തത്. അപകടത്തിന് പിന്നാലെ ഇയാള്ക്കെതിരെ നരഹത്യയ്ക്ക് കേസെടുത്തിരുന്നു.
പൊലീസ് കേസെടുത്തതിന് പിന്നാലെ നാസര് ഒളിവില് പോയിരുന്നു. ഇതിനിടയില് അപകടം സംഭവിച്ച ബോട്ടിന്റെ ഉടമ നാസറിന്റെ വാഹനം കൊച്ചിയില് പിടികൂടി. വാഹന പരിശോധനയ്ക്കിടെയാണ് നാസറിന്റെ വാഹനം പിടികൂടിയത്. നാസറിന്റെ സഹോദരനും അയല്വാസിയും വാഹനത്തില് ഉണ്ടായിരുന്നു.
22 പേരുടെ മരണത്തിനിടയാക്കിയ താനൂര് ബോട്ടപകടത്തില് മുഖ്യമന്ത്രി പിണറായി വിജയന് ജുഡീഷ്യല് അന്വേഷണം പ്രഖ്യാപിച്ചു. സാങ്കേതിക വിദഗ്ദരും അന്വേഷണ കമ്മിഷന്റെ ഭാഗമാകും. പൊലീസിന്റെ സ്പെഷ്യല് ടീം ആയിരിക്കും അപകടത്തില് അന്വേഷണം നടത്തുക. മരിച്ചവരുടെ കുടുംബങ്ങള്ക്ക് 10 ലക്ഷം രൂപ സര്ക്കാര് ധനസഹായം നല്കും.
താനൂരില് 22 പേരുടെ മരണത്തിനിടയാക്കിയ ബോട്ടപകടത്തില് മനുഷ്യാവകാശ കമ്മീഷന് സ്വമേധയാ കേസെടുത്തു. മാധ്യമ വാര്ത്തകളുടെ അടിസ്ഥാനത്തിലാണ് നടപടി. മലപ്പുറം ജില്ലാ കളക്ടറും ജില്ലാ പോലീസ് മേധാവിയും ആലപ്പുഴ ചീഫ് പോര്ട്ട് സര്വേയറും പത്ത് ദിവസത്തിനകം വിശദീകരണം സമര്പ്പിക്കണം. മേയ് 19 ന് തിരൂരില് നടക്കുന്ന സിറ്റിംഗില് കേസ് പരിഗണിക്കും. |