പുതിയ പാര്ലമെന്റ് മന്ദിരം ഈ മാസം 28ന് പ്രധാനമന്ത്രി നരേന്ദ്ര മോദി ഉദ്ഘാടനം ചെയ്തേക്കും. നരേന്ദ്ര മോദി സര്ക്കാര് അധികാരത്തില് വന്നിട്ട് ഒന്പതു വര്ഷം പൂര്ത്തിയാകുന്ന സാഹചര്യത്തിലാണ് പുതിയ പാര്ലമെന്റ് മന്ദിരം രാജ്യത്തിന് സമര്പ്പിക്കുന്നത്. 970 കോടി രൂപയാണ് പദ്ധതിയുടെ നിര്മാണച്ചെലവ്. ജൂലൈയില് ആരംഭിക്കാനിരിക്കുന്ന പാര്ലമെന്റിന്റെ വര്ഷകാല സമ്മേളനം പുതിയ കെട്ടിടത്തില് നടത്താന് സാധ്യതയില്ലെന്നാണ് റിപ്പോര്ട്ടുകള് സൂചിപ്പിക്കുന്നത്. ഇന്ത്യയുടെ അധ്യക്ഷതയില് ഈ വര്ഷം അവസാനം നടക്കുന്ന ജി 20 രാജ്യങ്ങളിലെ സ്പീക്കര്മാരുടെ യോഗം പുതിയ കെട്ടിടത്തില് നടന്നേക്കുമെന്നും റിപ്പോര്ട്ടുകളുണ്ട്.
ത്രികോണാകൃതിയിലാണ് പുതിയ പാര്ലമെന്റ് മന്ദിരം നിര്മിച്ചിരിക്കുന്നത്. കെട്ടിടത്തിന്റെ നിര്മാണ പ്രവൃത്തികള് 2021 ജനുവരി 15-നാണ് ആരംഭിച്ചത്. 64,500 ചതുരശ്ര മീറ്റര് വിസ്തീര്ണത്തിലാണ് ഈ നാലുനില കെട്ടിട നിര്മിച്ചിരിക്കുന്നത്. പുതിയ പാര്ലമെന്റ് മന്ദിരത്തിന് മൂന്ന് പ്രധാന കവാടങ്ങളുണ്ട്. അവയ്ക്ക് ഗ്യാന് ദ്വാര്, ശക്തി ദ്വാര്, കര്മ ദ്വാര് എന്നിങ്ങനെയാണ് പേരുകള് നല്കിയിരിക്കുന്നത്. എംപിമാര്ക്കും വിഐപികള്ക്കും സന്ദര്ശകര്ക്കുമായി പ്രത്യേകം പ്രവേശന കവാടങ്ങള് പുതിയ പാര്ലമെന്റ് മന്ദിരത്തിലുണ്ടാകും. രാജ്യത്തിന്റെ ജനാധിപത്യ പൈതൃകം പ്രദര്ശിപ്പിക്കുന്നതിനായി നിര്മിച്ച ഭരണഘടനാ ഹാള് ആണ് കെട്ടിടത്തിന്റെ മറ്റൊരു പ്രത്യേകത. |