ലണ്ടന്: യുകെയില് മലയാളി നഴ്സിന് ഡ്യൂട്ടിക്കിടയില് കുത്തേറ്റു. മാഞ്ചസ്റ്റര് റോയല് ഓള്ഡ്ഹാം എന്എച്ച്എസ് ആശുപത്രിയില് ജോലി ചെയ്യുന്ന അച്ചാമ്മ ചെറിയാനാണ് ആക്രമിക്കപ്പെട്ടത്. ശനിയാഴ്ച രാത്രി 11.30ന് ആയിരുന്നു സംഭവം. എന്നാല് സംഭവ ദിവസം മലയാളി നഴ്സിനാണ് കുത്തേറ്റത് എന്ന വിവരം പുറത്തു വന്നിരുന്നില്ല. ആശുപത്രിയില് ചികിത്സയ്ക്ക് എത്തിയ റൗമോണ് ഹക്ക് (37) എന്നയാളാണ് അച്ചാമ്മയെ ആക്രമിച്ചത്.
കഴുത്തിന് പിന്നില് പരുക്കേറ്റ അച്ചാമ്മ ചെറിയാന് ചികിത്സയില് തുടരുകയാണ്. അക്രമിയെ റിമാന്ഡ് ചെയ്തതായി ഗ്രേറ്റര് മാഞ്ചസ്റ്റര് പൊലീസ് അറിയിച്ചു. അക്യൂട്ട് മെഡിക്കല് വിഭാഗം യൂണിറ്റില് ശസ്ത്രക്രിയയ്ക്കായി ഉപയോഗിക്കുന്ന കത്രിക ഉപയോഗിച്ച് യാതൊരു പ്രകോപനവുമില്ലാതെ റൗമോണ് ഹക്ക് അച്ചാമ്മയെ ആക്രമിക്കുക ആയിരുന്നു എന്നാണ് പ്രാഥമിക വിവരം. നരഹത്യാശ്രമത്തിനാണ് പൊലീസ് ഇയാള്ക്കെതിരെ കേസെടുത്തത്. കഴിഞ്ഞ 10 വര്ഷമായി റോയല് ഓള്ഡ്ഹാം ആശുപത്രിയില് ജോലി ചെയ്തു വരികയാണ് അച്ചാമ്മ ചെറിയാന്. ആക്രമണത്തിന് ഇരയായ നഴ്സിനും കുടുംബത്തിനും എല്ലാവിധമായ പിന്തുണയും നല്കുമെന്ന് പൊലീസ് അറിയിച്ചു.