|
ഈ വിപത്തിനെ സംസ്ഥാനം മറികടക്കുമെന്നാണ് ആത്മവിശ്വാസമെന്നും ഈ സാഹചര്യത്തില് പൊതുസമൂഹം ജീവിതശൈലി മാറ്റേണ്ടിവരുമെന്നും മുഖ്യമന്ത്രി വാര്ത്താസമ്മേളനത്തില് പറഞ്ഞു. കൊവിഡിനെതിരെ കരുതലോടെ ജീവിക്കാന് ശീലിക്കണം. മാസ്ക് ധരിക്കലും അകലം പാലിക്കലും നിര്ബന്ധമാക്കണമെന്നും യാത്രകളും കൂടിച്ചേരലുകളും അത്യാവശ്യത്തിന് മാത്രമാക്കണമെന്നും മുഖ്യമന്ത്രി കൂട്ടിച്ചേര്ത്തു.
കൊവിഡ് എക്കാലവും തുടരും എന്ന മുന്നറിയിപ്പ് മുന്നില് കണ്ട് നാം മുന്കരുതല് സ്വീകരിക്കണമെന്ന് മുഖ്യമന്ത്രി പറഞ്ഞു. കൊറോണ വൈറസ് ഒരിക്കലും ഇല്ലാതാവില്ലെന്നാണ് ലോകാരോഗ്യ സംഘടന മുന്നറിയിപ്പ്. വാക്സിന്റെ അഭാവത്തില് എച്ച്ഐവിയെ പോലെ ലോകത്താകെ നിലനില്ക്കുന്ന വൈറസായി നോവല് കൊറോണ നിലനില്ക്കാനുള്ള സാധ്യതയുണ്ടെന്ന് വിദഗ്ദ്ധര് പറയുന്നു. ഈ സാഹചര്യത്തില് സമൂഹത്തിന്റെ രോഗപ്രതിരോധ ശക്തി വര്ധിപ്പിക്കലും കൊവിഡ് 19 നെ ചികിത്സിച്ച് സുഖപ്പെടുത്തുന്ന സംവിധാനം യാഥാര്ത്ഥ്യമാക്കലിനുമാണ് പ്രധാനം നല്കുന്നതെന്നും മുഖ്യമന്ത്രി പറഞ്ഞു.
പൊതുജനാരോഗ്യ സംവിധാനം അത്തരം ഇടപെടലില് കേന്ദ്രീകരിക്കും എന്നും മുഖ്യമന്ത്രി കൂട്ടിച്ചേര്ത്തു. പൊതുസമൂഹം ജീവിതശൈലിയില് ചില മാറ്റങ്ങള് ഉള്ക്കൊള്ളണം. മാസ്ക് പൊതുജീവിതത്തിന്റെ ഭാഗമാകണം. തിക്കും തിരക്കും ഉണ്ടാകാത്ത വിധം കച്ചവട സ്ഥാപനങ്ങളിലും ഗതാഗത സൗകര്യങ്ങളിലും ചന്തകളിലും ക്രമീകരണം വേണം. അത്യാവശ്യ യാത്രകളും കൂടിച്ചേരലുകളും മാത്രം നടത്തുക. ആളുകളുടെ എണ്ണം ക്രമീകരിക്കുക. ഇതിന് വ്യക്തികളും കുടുംബങ്ങളും സ്വയമേ തയ്യാറാകണം. ഭക്ഷണശാലകളിലും ഷോപ്പിങ് സെന്ററുകളിലും മുന്കൂട്ടി സമയം നിശ്ചയിച്ച് ഉപഭോക്താക്കള്ക്ക് സമയം നല്കണം. ലോക്ക് ഡൗണ് തുടര്ന്നാലും ഇല്ലെങ്കിലും ഇനിയുള്ള നാളുകള് നാം കൊറോണയെ കരുതിയാവണം ജീവിക്കേണ്ടത് എന്നും മുഖ്യമന്ത്രി നിര്ദ്ദേശിച്ചു. |
